O‘zbekiston chempioni – “Lokomotiv”ning Osiyo Chempionlar Ligasi guruh bosqichidagi raqibi – Qatarning “Al Duhail” jamoasi ayni paytda Qatar Yulduzlar Ligasining ikkinchi davra o‘yinlariga hozirlik olib bormoqda.

Shu sababli “Duhail” kecha Doha shahrida Afrika millatlar kubogiga tayyorlanayotgan Tunis terma jamoasi bilan o‘rtoqlik o‘yini o‘tkazdi. Qiziqarli tarzda kechgan bellashuvda Qatar klubi 1:0 hisobida g‘alabaga erishdi. O‘yin taqdirini hal qilgan yagona golni “Duhail” yetakchisi Yusuf Msakni kiritishga muvaffaq bo‘ldi.

“Duhail” o‘yinni ushbu tarkibda o‘tkazdi: Klod Amin, Lukas Mendez, Dame Traore, Mohamed Mussa, Murad Nagiy, Karim Budiaf, Luis Martin, Nam Tae Hi, Hazim Mustafo, Yusuf Msakni, Yussuf Al Arabi.

“Al Duhail” navbatdagi rasmiy uchrashuvini 13 yanvar kuni Yulduzlar Ligasi doirasida “Qatar SK”ga qarshi mehmonda o‘tkazadi.

Ta’kidlab o‘tamiz, “Duhail” chempionatning ilk davrasini 11ta o‘yinda 29 ochko jamg‘arib, 1-pog‘onada tugatdi.