«Chelsi» bosh murabbiyi Antonio Konte Angliya liga kubogi yarim final bosqichi doirasida bo‘lib o‘tgan «Arsenal»ga qarshi o‘yin (0:0) borasida o‘z fikrlarini bildirib o‘tdi.

«Agar hakamlarda qandaydir shubhalar bo‘lsa, ular xatoni to‘g‘rilashlari mumkin. Lekin bunga qo‘shimcha vaqt ketadi. Nazarimda, videotakrorlarning yagona kamchiligi — vaziyatni ko‘rish uchun qo‘shimcha vaqt sarflanishidir. Bunday holatlarda hakamlar ikkinchi bo‘limga ko‘proq kompensasiya vaqtini qo‘shishlari kerak. Italiyada o‘yinga 7, 8 hattoki 9 daqiqa qo‘shishlari mumkin. Hakamlarda bahsli vaziyatni qayta ko‘rish uchun imkoniyat bor. Men buni to‘g‘ri deb hisoblayman.

Hamisha g‘alaba qozonish uchun harakat qilish kerak. Bugun g‘alaba qozonish uchun qo‘limizdan kelgan barcha ishni qildik. Ko‘p vaziyatlar yaratdik, ammo ulardan foydalanishda samarali harakat qila olmadik.

Har bir o‘yin o‘ziga xos ahamiyatga ega. «Arsenal»ning bugungi va APL doirasidagi o‘yinini taqqoslasak, ikki xil jamoaga guvoh bo‘ldik. Ular bugun himoyada harakat qilib, qarshi hujumdan foydalanish payida bo‘lishdi. Avvalgi bahsda ular ochiq futbol namoyish qilishgandi.

Keyingi o‘yinda imkoniyatlar — 50/50. Dastlabki o‘yinda gol o‘tkazib yubormaganimiz juda muhim. Ammo bizni «Arsenal»ga qarshi safardagi uchrashuv kutib turibdi. Finalga chiqishni istasak, javob o‘yiniga yaxshi tayyorgarlik ko‘rishimiz kerak», – dedi Konte.