Football Leaks «Barselona» hujumchisi Lionel Messi yangi shartnoma bo‘yicha qancha maosh olayotgani haqidagi ma’lumotlarni oshkor qildi. Unga ko‘ra, argentinalik futbolchi soliqlarni chiqarib tashlamagan holda hisoblaganda, yiliga 104 million yevro maosh oladi.

Bunday katta miqdordagi daromad futbol tarixida ilk marta uchramoqda, deya xabar tarqatdi Mediapart. Soliqlar chiqarib tashlangandan keyin esa, ushbu summa 50 million yevrodan biroz kamroqni tashkil qiladi.

Taqqoslash uchun, «PSJ» hujumchisi Neymarning bir yillik sof daromadi 36,8 million yevroni tashkil qilsa, Karlos Teves Xitoyning «Shangxay Shenxua» klubida yiliga 38 million yevro olayotgandi.

Messining "Barselona"dagi qayd etilgan eng kam yillik maoshi (15% imij daromadlarini qo‘shib hisoblaganda) 71 million yevroni tashkil etadi. Shuningdek, shartnomada futbolchining 4 yil davomida 63,5 million yevro miqdorida turli bonuslar olishi nazarda tutilgan. Bundan tashqari, agar Leo shartnomaning oxirigacha «Barsa»da qolsa, yana 70 million yevro mukofot oladi.

Bularning barchasi qo‘shib hisoblaganda, futbolchining yillik maoshi 104 million yevroni tashkil etadi.