Bugun 23 yoshgacha bo‘lgan futbolchilar o‘rtasida Osiyo chempionati final bosqichi “A” gurug‘i 3-turiga start beriladi. Ayni damda, ikkinchi turdan so‘ng 3 ochko bilan guruhda ikkinchi o‘rinni egallab turgan O‘zbekiston olimpiya termasi guruhda so‘nggi o‘rinda borayotgan Ummonga qarshi maydonga tushadi.
Xitoyga qarshi uchrashuvdan keyin matbuot anjumanida jamoa bosh murabbiyi Ravshan Haydarov Ummonga qarshi jamoa yanada jiddiyroq tayyorgarlik ko‘rishini ta’kidlagan edi.
“Biz Ummonga qarshi uchrashuvda yanada jiddiyroq tayyorgarlik ko‘ramiz. Guruhdagi vaziyat qiyin va keyingi o‘yinda faqat g‘alaba uchun to‘p suramiz”, - dedi Haydarov.
Ushbu musrbaqaning ilk turida jarohat olgan Akrom Komilov maydonga tushishi noaniq. Himoyachi jamoa mashg‘ulotlarida shug‘ullanmoqda, ammo uning jarohati to‘liq tuzalmagan va uning maydonga tushishi hamon so‘roq ostida.
Bugungi raqib Ummon ikki turdan so‘ng guruhda so‘nggi o‘rinni egallab turibdi. Ammo, jamoa bungacha ikkita uchrashuvda ham yaxshi taassurot qoldirgan. Ummon turnirgacha Forz Ko‘rfazi kubogida ishtirok etib, ushbu turnirda g‘alaba qozongan va jamoaning kuchli tomonlari ko‘p.
O‘zbekiston va Ummon uchrashuvi“Sport” telekanalida soat 13:00 dan boshlab to‘g‘ridan-to‘g‘ri namoyish etiladi.
U-23 Osiyo chempionati
“A” guruhi, 3-tur
15 yanvar, dushanba
13:00 O‘zbekiston – Ummon
