2018 yilning 7-12 fevral kunlari Yaponiyada O‘zbekiston Superligasida ishtirok etayotgan klublarning marketing bo‘yicha mutaxassislari uchun seminar tashkil etiladi.

Ushbu seminar o‘tgan yilning 17 noyabr kuni O‘FF Prezidenti Umid Ahmadjonov va Yaponiya Futbol Assosiasiyasining Prezidenti Tashima Kodzo o‘rtasida imzolangan memorandum asosida tashkil etilayotganini ham alohida ta’kidlash kerak.

Seminar davomida Jey-liga mutaxassislari tomonidan milliy chempionatimiz klublari marketing mutaxassislari uchun nazariy va amaliy mashg‘ulotlar o‘tkaziladi.

Shuningdek,marketing bo‘yicha mutaxassislar Jey-ligada marketing, homiylarni jalb qilish bo‘yicha olib borilayotgan chora-tadbirlar haqida ma’lumot olishadi.

Aytish kerakki, Yaponiya Jey-ligasida marketing sohasi juda rivojlangan bo‘lib, Jey-liga birgina 2017 yil davomida jami 240 million AQSH dollari miqdorida homiylik mablag‘lariga ega bo‘lgan.

Klublarimiz vakillari uchun bunday xorijiy safarlar, seminarlar o‘z sohalari bo‘yicha bilimlarini oshirish, xorij tajribasini o‘rganish va uni o‘zi faoliyat yuritayotgan klublarda tatbiq qilish maqsadida tashkil qilinmoqda.