Avval xabar berilganidek, shu yilning 17–20 yanvar kunlari O‘zbekiston Professional futbol ligasining Muxlislar bilan ishlash va sport tadbirlarini o‘tkazish bo‘limi xodimlari “Navbahor”, “Neftchi”, “Sementchi” va “Qo‘qon-1912” klublari ishqibozlari bilan uchrashish uchun Farg‘ona va Namangan viloyatlariga yo‘l olgan edi.

Kecha, 17 yanvar kuni Muxlislar bilan ishlash bo‘limi xodimlari “Qo‘qon-1912” klubining ishqibozlari bilan uchrashuv o‘tkazdi. Uchrashuv davomida klub tomonidan muxlislarga yaratilishi lozim bo‘lgan shart-sharoitlar to‘g‘risida fikr almashildi. O‘z navbatida, “Qo‘qon-1912” muxlislari o‘yin vaqtida uchraydigan muammo va kamchiliklar haqida o‘z fikrlarini bildirdi.

Shuningdek, Muxlislar bilan ishlash bo‘limi xodimlari “Markaziy” stadionni ko‘zdan kechirdi. Yangi mavsumga tayyorgarlik ko‘rayotgan klub stadionida ayni vaqtda ta’mirlash ishlari olib borilmoqda.

Tashrif yakunida, muxlislarning talab va takliflarini inobatga olgan holda “Qo‘qon-1912” futbol klubi tomonidan ishqibozlar bilan ishlashni yanada yaxshilash, ularga yetarlicha sharoit yaratish yuzasidan chora-tadbirlar ishlab chiqildi, tomonlar o‘zaro hamjihatlikda ishlashga kelishib oldi.

Muxlislar bilan ishlash bo‘limi xodimlarining navbatdagi manzili — “Neftchi” futbol klubi bo‘ladi.

Bu kabi amalga oshirilayotgan chora-tadbirlar O‘zbekistondagi futbol klublarining muxlislar bilan ishlash faoliyatini takomillashtirish, stadionlarda muxlislarga yaratiladigan sharoitlarni yanada yaxshilash, muxlislar bilan ishlashning yangicha uslublarini joriy etish orqali muxlislarni stadionga qaytarish hamda futbol klublari muxlislari safini yanada kengaytirish ishlarini yangi bosqichga olib chiqishga xizmat qiladi.