Osiyo chempionati chorak finalida Yaponiyani yirik 4:0 hisobida mag‘lub etib, yarim finalga yo‘l olgan O‘zbekiston olimpiya terma jamoasi bosh murabbiyi Ravshan Haydarov ucharshuvdan keyingi matbuot anjumanida g‘alabani barcha muxlislarimizga bag‘ishlaganini ta’kidladi.

“Ushbu g‘alabani birinchi navbatda bizni qo‘llab-quvvatlagan muxlislarga va kecha Qozog‘istonda fojeali tarzda halok bo‘lgan yurtdoshlarimizning oila a’zolariga bag‘ishlaymiz. Ushbu o‘yinga jiddiy va katta ma’suliyat bilan tayyorgarlik olib bordik. Qolaversa, uchrashuvdan oldin O‘zbekiston futbol federasiyasi prezidenti Umid Ahmadjonov bizga yuborgan murojaatnomasi yigitlarni yanada ruhlantirdi.

Uchrashuv biz tanlagan reja ostida o‘tdi. Yaponiyaning tezkorligi va to‘p bilan yaxshi muomala qilishini oldindan bilar edik va ularni bu sifatlarini pressing orqali to‘xtatishga urindik. Buning natijasida yaratilgan golli vaziyatlardan unumli foydalana oldik. Aytish mumkinki, futbolchilar bugungi reja va ko‘rsatmalarni to‘liq bajarishdi”, — deydi Haydarov.