Turkiya yig‘inidagi oxirgi nazorat o‘yinida “Paxtakor” “Vardar”ni 2:0 hisobida mag‘lubiyatga uchratdi.

Uchrashuvda "Paxtakor"ning ustunligi sezilib turdi va ikkinchi bo‘limda urilgan gollar bellashuv g‘alabamiz bilan tugashini ta’minladi. Tanaffusga qadar raqib posboni jamoamizdan Hakimov, A’zamov va Ahmedovning urinishlarini bartaraf erishga muvaffaq bo‘ldi.

Ikkinchi bo‘limda zaxiradan tushirilgan futbolchilar makedoniyaliklar darvozasini ishg‘ol etishdi. Dastlab Ibrohimov aniq zarbasi bilan hisobni ochgan bo‘lsa, oradan ko‘p o‘tmasdan Kanyuk yaqin masofadan oradagi farqni ikkitaga yetkazdi. Shunday qilib, Turkiyadagi oxirgi nazorat uchrashuvida "Vardar" 2:0 hisobida dog‘da qoldirildi.

"Paxtakor" Turkiyada o‘tgan yig‘inni yakunladi va 22 yanvardan tayyorgarlikni Toshkentda davom etiradi. Belekda "Turgutluspor" (3:0), "Amedspor" (2:0), "Partizani" (3:1) va "Vardar" (2:0)ga qarshi nazorat o‘yinlari o‘tkazilganini eslatib o‘tamiz.

"PAXTAKOR" - "VARDAR" - 2:0 (0:0)

Gollar: Ibrohimov 76, Kanyuk 83.

"Paxtakor": Lobanov (Suyunov, 46), Kozak (Sayfiyev, 46), Simich, A’zamov (Tojiyev, 84), Shorahmedov, Rahmatullayev (Kanyuk, 77), Ahmedov (Ismatullayev, 65), Masharipov, Iskanderov, Abdurahimov (Ibrohimov, 65), Hakimov (G‘anixonov, 77).