O‘zbekiston olimpiya terma jamoasi Xitoyda bo‘lib o‘tayotgan 23 yoshgacha bo‘lgan futbolchilar o‘rtasidagi Osiyo chempionatida ertaga yarim final bahsini o‘tkazadi. Vakillarimizga Janubiy Koreya termasi raqiblik qiladi. Mazkur o‘yin oldidan koreyaliklar bosh murabbiyi Kim Bong Gil o‘z fikrlarini bildirib o‘tdi.

"Shogirdlarimning sa’y-harakatlari evaziga yarim finalgacha yetib keldik. Men ko‘rgan jamoalar ichida O‘zbekiston — mudofaa va hujum chizig‘i orasida muvozanatga ega. Ertangi raqibimiz — juda yaxshi jamoa" — dedi Kim.

"Ba’zi futbolchilardan kichik jarohatlar bor, shuningek, o‘yinchilarda charchoq alomati sezilmoqda. Shunga qaramay, o‘z o‘yin uslubimizni namoyish qilishga harakat qilamiz. Biz raqibga nisbatan bir kun kam dam oldik. Bu esa biz uchun yaxshi emas. Ammo biz o‘z kuchimizga ishongan holda kuchsiz tomonlarimizni yopishga harakat qilamiz" — Kim Bong Gil.