O‘zbekiston yoshlar terma jamoasi bosh murabbiyi Ravshan Haydarov Koreyaga qarshi uchrashuv oldidan o‘tkazilgan matbuot anjumanida ishtirok etdi va ushbu uchrashuv turnirdagi eng muhim uchrashuv ekanini ta’kidladi.

“Men avvalambor, yarim finalga yo‘l olgan barcha jamoalarni tabriklayman. Yarim final uchun juda ko‘p kuch sarflandi. Bizni oldinda juda qiyin uchrashuv kutib turibdi. Koreya juda kuchli jamoa va ularga qarshi juda yaxshi tayyorgarlik ko‘rdik. O‘ylaymanki, biz yaxshi o‘yin namoyish etib, barchani xursand qila olamiz”, — dedi Haydarov.

“Yaponiyaga qarshi uchrashuvdagi futbolchilarning shijoatini yana ko‘rishni istaymiz. Albatta, yarim finalga ruhiy jihatdan ham, jismoniy jihatdan ham tayyorgarlik olib borayapmiz. Hozirda, bir necha nafar futbolchimizda kichik jarohatlar bor, ammo ularning yarim final uchrashuvida o‘ynashlari uchun hozirda barcha ishlar qilinayapti”, - deydi Haydarov.

“Koreya turnirdagi barcha uchrashuvlarni aynan bitta stadionda o‘ynayotgani va biz bu stadionda birinchi marta to‘p surishimiz, ta’sir ko‘rsatadi deb, o‘ylamayman. Biz Xitoyda o‘ynayapmiz. Aytishim mumkinki, turnirdagi barchaga sharoit bir xil”, - dedi Haydarov.