Kecha futbol bo‘yicha O‘zbekiston Olimpiya terma jamoasi Xitoyda bo‘lib o‘tgan yoshlar o‘rtasidagi Osiyo Chempionati musobaqasi finalida Vyetnam termasini 2:1 hisobida mag‘lubiyatga uchratib, shohsupaga ko‘tarilishgandi.
Avvalroq, O‘zbekiston Olimpiya terma jamoasi a’zolari bugun, 28 yanvar kuni Toshkent vaqti bilan soat 23:50 da Urumchi orqali Toshkentga uchib kelishlari haqida xabar bergandik.
Stadion.uz nashriga yaqin manbalarning xabar berishicha, Osiyo chempionatida muvaffiqiyat qozongan futbolchilarning har biriga “Chevrolet Malibu” avtomobillari sovg‘a etiladi.
Chempionlar bugun, soat 23:50da “Islom Karimov” nomidagi Toshkent xalqaro aeroportida tantanali tarzda kutib olinadi.
Shaxsan O‘zbekiston Respublikasi Prezidenti Shavkat Mirziyoyevning topshirig‘iga binoan futbolchilar “O‘zbekiston” mehmonxonasida taqdirlanishadi.
Ma’lum bo‘lishicha, soat 00.00 da ular chiqqan avtobus Aeroport terminal-3 (mahalliy) Bobur, Nukus, Afrosiyob, Sharof Rashidov, Navoiy ko‘chasi hamda Amir Temur aylanmasi va O‘zbekiston mehmonxonasi bo‘ylab harakatlanadi!
Akmal Eshonxonov
