Osiyo chempioni sifatida Toshkentga qaytib kelgan O‘zbekiston U23 terma jamoasi yarim himoyachisi Javohir Siddiqov musobaqadan olgan taassurotlari bilan o‘rtoqlashdi.

"Finalga yetib kelib, chempionlikka bir qadam qolgan edik. Hal qiluvchi o‘yinda g‘alaba qozonsak, buni barcha umrbod eslab qolardi. Musobaqada finalgacha yetib kelish boshqa, chempion bo‘lish boshqa. Bular bir-biridan keskin farq qiladi. Shuni yaxshi his qilgan holda finalga har tomonlama — ruhiy va jismoniy jihatdan yaxshi tayyorgarlik ko‘rishga harakat qildik. Noqulay ob-havoda o‘ynash qiyin bo‘ldi, ammo qorda o‘ynashning ham o‘ziga yarasha zavqi bor ekan. Qiyinchilik bilan erishilgan g‘alaba shirinroq bo‘ladi. Buni uzoq vaqt davomida eslab yuramiz", — dedi Javohir Siddiqov Uzreport telekanaliga bergan intervyusida.