Toshkentning “Lokomotiv” klubi Osiyo Chempionlar Ligasi-2018 guruh bosqichi doirasidagi ilk o‘yinini 12 fevral kuni BAAning “Al Vahda” jamoasiga qarshi o‘tkazadi.

Ayni paytda “temiryo‘lchilar” jamoasi yangi mavsumning muhim bellashuvlariga tayyorgarlikka zo‘r bergan. O‘zbekiston chempioni va mamlakat kubogi sohibi hozirda Turkiyaning Belek shahrida mavsumoldi xorij yig‘inini o‘tkazmoqda. “Loko”ning mahoratli yarim himoyachilaridan biri Ikrom Aliboyev jamoaning tayyorgarlik jarayoni qanday ketayotgani xususida klub rasmiy saytiga gapirib berdi:

– Jamoamiz yangi mavsumga tayyorgarlikni ko‘ngildagidek olib bormoqda. Rahbariyat tomonidan bizga a’lo darajada sharoitlar yaratib berilgan. Ayni damda Belekda yig‘in o‘tkazyapmiz. Bu yer mashg‘ulot o‘tkazish uchun juda ham qulay. Dubayda o‘tgan ilk xorij yig‘inimizda asosan jismoniy tayyorgarlikka e’tibor qaratilgan edi. Belekda esa ko‘proq to‘plar bilan ishlayapmiz. Shuningdek, yangi taktik usullar borasida ham ish olib borilmoqda.

Yaxshi forma tiklab olishimiz uchun o‘tkazilayotgan nazorat o‘yinlarining ham ahamiyati yuqori. Tanlangan sparring raqiblar saviyasi esa ancha yaxshi ekanini ayta olaman. Misol uchun, Shotlandiyaning yetakchi jamoalaridan biri – “Aberdin”, shuningdek rus klublari – “Krasnodar”, “Rubin” bilan o‘ynadik. Kecha esa Bolgariya jamoasi bilan bahs yuritdik. Bilasizmi, kuchli jamoalarga qarshi o‘ynash har qanday futbolchi uchun foydali. Biz ham mana shunday yaxshi saviyali jamoalar bilan o‘ynab, Osiyo Chempionlar Ligasiga munosib hozirlik ko‘ryapmiz. Zero Chempionlar Ligasida kuchsiz jamoalar bo‘lmaydi. Shunga monand biz ham imkon qadar tezroq yaxshi sport formasiga kirib olishimiz talab etiladi.

Oldimizga har galgidek juda yuqori maqsadlar qo‘yilmoqda. Yangi mavsumda eng kamida o‘tgan yilgi natijalarni takrorlashni rejalashtiryapmiz. Shuningdek, bu yil Chempionlar Ligasida ham ulkan g‘alabalar qo‘lga kiritib, muxlislarimizni xursand qilishga harakat qilamiz, – deydi Ikrom Aliboyev.