O‘zbekiston Milliy Olimpiya Qo‘mitasi prezidenti va mamlakat futbol Assosiasiyasi 1-vise-prezidenti Umid Ahmadjonov Osiyo chempionlar ligasi pley-off bahsidan o‘rin olgan “Al-Garafa”ga qarshi uchrashuvda O‘zbekiston vakili bo‘lgan “Paxtakor” jamoasini qo‘llab-quvvatlash uchun O‘FA Ijroqo‘mi a’zosi, "Paxtakor" FK prezidenti Bobur Shodiyev bilan birga Qatar poytaxti Dohaga yo‘l olgani haqida xabar berib o‘tgandik.
Umid Ahmadjonov Dohada Bobur Shodiyev bilan birgalikda Qatar Milliy Olimpiya Qo‘mitasi vise-prezidenti Doktor Taniy Al-Kuvariy hamda “Al-Garafa” klubi prezidenti Hamad bin Tamiyr bilan uchrashdi.
Uchrashuv davomida Umid Ahmadjonov Qatar MOQ vise-prezidenti Doktor Taniy Al-Kuvariy bilan Olimpiya sport turlarini rivojlantirish, bu borada tajriba almashish masalalari bo‘yicha suhbatlashdi.
Qatar davlati ham mamlakatda Olimpiya sport turlarini rivojlantirish va bo‘lg‘usi Olimpiadada katta natijalarga erishishni maqsad qilib qo‘ygan. Uchrashuvda O‘zbekiston MOQ bu borada Qatar bilan hamkorlik qilishi bo‘yicha kelishuvga erishildi.
