Madridning “Real” klubi joriy mavsum yakunida tarkibni kuchaytirish uchun 570 million yevro sarflashni rejalashtirgan.

Madridliklar 200 million funt (228 mln yevro) evaziga “Tottenxem” hujumchisi Xarri Keynni sotib olishni rejalashtirgan. Xuddi shu miqdorga “Chelsi”dan Eden Azar xaridi amalga oshirilishi kutilmoqda.

Har ikki transfer xaridi ham dunyo futbolida rekord ko‘rsatkich bo‘ladi. Ma’lumki, braziliyalik futbolchi Neymarning “Barselona”dan o‘tishi PSJga 222 mln yevroga tushgan va aynan shu transfer jahon futbolidagi yagona rekord hisoblanadi.

Bundan tashqari, madridliklar “Manchester Yunayted” klubidan David De Xeani “Real”ga o‘tishi uchun 100 mln funt (114 mln yevro) taklif etishni rejalashtirishgan.

Bosh murabbiy Zinedin Zidanning “Real”dagi o‘rnini esa “Tottenxem” ustozi Maurisio Pochettino egallashi ehtimoli katta.

Ma’lumot uchun, “qirollik klubi” Ispaniya La ligasining 21-turidan so‘ng, 38 ochko bilan 4-o‘rinni egallab turibdi. Zidan shogirdlari o‘tgan yil La liga, Yevropa Chempionlar ligasi va klublar o‘rtasidagi jahon chempionati musobaqalarida g‘olib chiqishgandi.

Ammo yangi mavsum Krishtianu Ronaldu jamoadoshlariga unchalik omad keltirmayapti. Chunki, ular o‘z maydonlarida eng asosiy raqobatchi “Barselona”dan 0:3 hisobida yengilishdi.

Ustiga-ustak 4 oylik tanaffusdan keyin safar o‘yinida g‘alaba qozonishdi. Albatta, bu natija “qirollik klubi” uchun qoniqarli emas.