"Manchester Yunayted" safidagi o‘yinlari bilan dunyoga tanilgan Andrey Kanchelskis bir necha kun oldin Toshkentga tashrif buyurdi.

U aviahalokatda hayotdan ko‘z yumgan futbolchilarning oilasiga yordam beruvchi xayriya jamg‘armasi a’zosi sifatida poytaxtimizga keldi.

Andrey Antanasovichning Toshkentga tashrifidan maqsadlari bilan qiziqdik:
- Bizda aviahalokatda hayot bilan vidolashgan futbolchilar oilalariga ko‘mak beruvchi loyiha bor. Uning vakili sifatida bu yerga keldim. Toshkentga oxirgi marta Sobiq Ittifoq davrida "Paxtakor"ga qarshi o‘ynaganimizda kelgandik. Men yana sport tibbiyoti jihozlari bilan shug‘ullanuvchi «Zepter» kompaniyasi yuzi hisoblanaman. Jarohatdan keyin tiklanishga yordam beruvchi jihozni tanishtirish uchun ham keldim.

Jahon futboli aviahalokatdan jabr ko‘rgan o‘ndan ortiq klublarni xotirlab keladi. Ishimizni Toshkentdan boshlashni xohlaymiz. 1979 yilgi fojiada "Paxtakor"ning 17 nafar a’zosi halok bo‘lganini bilamiz. Bu borada O‘zbekiston futbol assosiasiyasi bilan muzokara o‘tkazdik.

Bir vaqtning o‘zida «Manchester Yunayted» va «Torino» klublari bilan suhbatga kirishganmiz. Futbol uchrashuvlari tashkil etishni rejalashtiryapmiz. O‘yindan kelib tushgan mablag‘ marhumlarning oilalariga yordam uchun beriladi. FIFA elchisi sifatida bunday o‘yinlarga ko‘proq mashhur futbolchilarni jalb qilishga intilaman.