Namangan shahrida Namangan viloyat hokimi kubogi musobaqasi bo‘lib o‘tdi. Viloyat jamoalariga munosib yoshlarni tanlab olish maqsadida an’anaviy tarzda o‘tkazib kelinayotgan musobaqada bu safar 12 ta jamoa g‘oliblik uchun bahs yuritdi.

Qatnashchilar dastlabki bosqichda to‘rtta guruhga bo‘lingan holda bahslarga kirishdilar. Guruhlarda g‘oliblikni qo‘lga kiritgan jamoalar esa final bosqichda bosh sovrin uchun kurashish imkoniga ega bo‘lishdi.

Hal qiluvchi bosqichda “Navbahor”, “Quruvchi”, 15-DIMI va NOZK jamoalari davrali tizim asosida bir-birlari bilan bahs olib borishdi.

Kuchli to‘rtlikdan o‘rin olgan uchrashuvlar ancha keskin va murosasiz ruhda o‘tganligini aytish joiz.

Aynan shu sababli yakunda “Navbahor”, 15-DIMI hamda NOZK jamoalari bir xil oltitadan ochko jamg‘arishdi.

“NavbahorUmid” futbol maktabi tarbiyalanuvchilari ikkita uchrashuvni yirik hisobda g‘alaba qozonishgani sababli to‘plar nisbatiga ko‘ra g‘oliblikni qo‘lga kiritishdi.

Ikkinchi o‘rin 15-DIMI jamoasiga, nasib etdi. Uchinchi o‘rinni esa NOZK jamoasi band etdi. Musobaqaning taqdirlash marosimi 2 fevral kuni o‘tkaziladi.

“Navbahor” FK matbuot xizmati.