Xabar berib o‘tganimizdek, 9-25 fevral kunlari Janubiy Koreyaning Pxyonchxan shahrida XXIII qishki Olimpiya o‘yinlari o‘tkaziladi.

Mazkur olimpiada kabi yirik jahon ahamiyatidagi musobaqalarni translyasiya kilish huquqlariga amal qilgan holda ko‘rsatilishi xalqaro maydonda, shu jumladan, sport hamjamiyatida yurtimiz va sportimiz mavqeini, imidjini yanada ko‘tarishi aniq. Shuni e’tiborga olgan holda va o‘zbekistonlik muxlislarga qishki olimpiya o‘yinlarini bevosita kuzatish imkonini yaratish maqsadida O‘zbekiston Milliy olimpiya qo‘mitasi "UZREPORT TV" telekanaliga XXIII qishki Olimpiya o‘yinlarining eksklyuziv huquqini rasmiy sotib olish taklifi bilan chiqdi.

Telekanal bu taklifni xar tomonlama qo‘llab-quvvatlab, tegishli kelishuvga erishdi va Olimpiya o‘yinlari translyasiyasining eksklyuziv huquqini sotib oldi. Demak, O‘zbekiston hududida 2018-yilgi qishki Olimpiya o‘yinlarini translyasiyasi eksklyuziv huquqi faqat "UZREPORT TV" telekanaliga tegishli bo‘lib, o‘zbekistonlik sport i[losmandlari Olimpiya o‘yinlarini aynan ushbu telekanal orqali tomosha qilish imkoniyatiga ega bo‘lishadi.

Ma’lumot uchun, ishni professional tarzda tashkil qilgan "UZREPORT TV" telekanali bunga qadar futbol bo‘yicha Yevropa chempionlar ligasi, Yevropa ligasi, Angliya Premyer-Ligasi, Ispaniya La-Ligasi, Yevro-2016, shuningdek, boks bo‘yicha Germaniyaning Gamburg shahrida o‘tkazilgan jahon chempionati va qishki Osiyo o‘yinlarining translyasiya huquqini xarid qilgandi. Endi telekanal o‘z tarixida birinchi marta “Oq olimpiada” translyasiyasining eksklyuziv huquqini xarid qildi.