Bo‘lajak mavsumga astoydil tayyorgarlik olib borayotgan andijonliklar ayni damda Toshkentda yig‘in o‘tkazmoqda. 

Eldor Sakayev boshqaruvidagi “burgutlar” mashg‘ulotlar bilan birga kun-ora nazorat uchrashuvlarida maydonga tushmoqda. Xususan bugun “Andijon” poytaxtdagi “Obod” stadionida Qozog‘istonning “Maxtaorol” jamoasi bilan bellashdi. 

O‘yinda “Andijon” murabbiylar shtabi tarkibdagi o‘yinchilarni yana bir ko‘zdan kechirib, sinovdan o‘tkazganligini aytish lozim. Bahsning dastlabki taymida hisob ochilmadi. Ikkinchi bo‘limda esa zaxiradan maydonga tushgan Ma’rufjon Zokirjonov yaratilgan vaziyatdan unumli foydalanib, hisobni ochishga muvaffaq bo‘ldi – 1:0.

Garchi qolgan daqiqalarda gol urish imkoniyati bo‘lsada, darvozalarga boshqa to‘p kiritilmadi. 

Shu tariqa “Andijon” navbatdagi nazorat uchrashuvida g‘alaba qozondi.

“Andijon”ning boshlang‘ich tarkibi quyidagicha ko‘rinishda bo‘ldi:

Muhiddin Xudoyorov, Artur Mamatkazin, Siroj Hamroyev, Islom Inomov, Mirshohid Olimov, Ma’ruf Murodov, Sunnat Abdullajonov, Obid Hakimov, Ibrohim Otaxonov, Eldor Boymatov, Alisher Abduvohidov. 

Ikkinchi bo‘limda tushganlar: Alibek Turobov, Mirjalol Rajabov, Ziynatillo Ikromjonov, Baxtiyor Qosimov, Usmonali Ismonaliyev, Vusol Magerramov, Jahongir Mahsudov. 

Jamoa tarkibiga yangi futbolchilarning kelib-qo‘shilishi davom etmoqda. Kuni-kecha “Obod”ning sobiq yarim himoyachisi Obid Hakimov “Andijon” safiga qo‘shildi. Seleksiya ishlari to‘xtagani yo‘q va hozirgi kunda murabbiylar yana ayrim futbolchilar bilan muzokara olib bormoqda.     

 «Andijon» matbuot xizmati.