Yangi mavsumda o‘z oldiga Pro-Liga-2018da g‘olib bo‘lib, Superligaga chiqish vazifasini qo‘ygan «Dinamo» jamoasi 20 fevraldan Toshkentda yig‘in boshladi.
2018 yilgi tayyorgarlik rejasi doirasida dastlab 20-28 dekabr kunlari, so‘ng 6-30 yanvar, 5-16 fevral kunlari Samarqanddagi qarorgohda o‘quv-mashg‘ulot yig‘inini tashkil etgan «Dinamo» jamoasi Navoiyda «Qizilqum», Qarshida «Nasaf», Samarqandda esa «Sochak» va «Sherdor» klublari bilan nazorat bahslarida maydonga tushishgandi.
20 fevral, seshanba kunidan esa yig‘inning yakuniy bosqichi poytaxtda boshlandi. Ilhom Sharipov menejerligida, Uchqun Qobilov, Rafael Balasanyan murabbiyligida ikki hafta davom etishi ko‘zlangan ushbu yig‘inda nazorat bahslari rejalashtirilgan bo‘lib, tarkibda bir qator futbolchilar sinovdan o‘tkaziladi.
