Toshkentda o‘tkazilayotgan o‘quv-mashg‘ulot yig‘inining so‘nggi kunida “Qizilqum” futbolchilari Tojikiston chempioni, Dushanbe shahrining “Istiqlol” jamoasiga qarshi maydonga tushishdi.
Uchrashuv teng kurashlar ostida boshlangan bo‘lsada, keyinchalik tashabbus navoiyliklar tomonida bo‘ldi. Nemanya Yovanovich, Doniyor Usmonov, Erkin Boydullayev tomonidan yo‘llangan zarbalarni mehmonlarning legioner posboni Stoshich muvaffaqiyatli bartaraf etib turdi. Bir vaziyatda Grigalashvilining zarbasi darvoza ustuniga tegib qaytdi.
Ikkinchi bo‘limda ham navoiyliklar tashabbusni o‘z qo‘llarida saqlab turishdi. Ammo tojikistonlik futbolchilarning kam sonli hujumlaridan biri gol bilan yakunlandi. Sergey Zenkoning kuchli zarbasi “Qizilqum” himoyachilaridan biriga tegib yo‘nalishi biroz o‘zgartirdi va darvozaning uzoq burchagiga borib tushdi.
Shundan keyin ham “Qizilqum” futbolchilari hujumkorlini susaytirishmadi. 75-daqiqada Erkin Boydullayevning uzoq masofadan yo‘llagan zarbasi raqib himoyachilaridan biriga tegib, “rikoshet” holatida darvoza to‘ridan joy oldi – 1:1.
Bo‘lim oxirlarida navoiyliklar sardori jamoasiga g‘alaba taqdim etishi ham mumkin edi. Darvozabon bilan deyarli birga bir vaziyatga chiqib borgan tajribali yarim himoyachi to‘pni o‘zidanda qulayroqda turgan sherigiga oshirishga urindi va to‘p darvoza ustuni oldidan o‘tib ketdi. Natijada tomonlar uchrashuvni durang bilan yakunlashdi.
Nazorat uchrashuvi. 23.03.2018.
“Qizilqum”- “Istiqlol” (Dushanbe) 1:1.
Toshkent. JAR stadioni.
Bosh hakam: Ahrol Risqullayev.
Gollar: Erkin Boydullayev (75) – Nikolay Zinko (67).
“Qizilqum”: Yevgeniy Cheremisin, Muhsin Ubaydullayev, Fayzulla Qambarov, Giorgi Kvesiyeshvili, Sherali Jo‘rayev, Erkin Boydullayev, Samandar Shodmonov (Nodirxon Kamolov, 46), Mirjalol Qosimov, Doniyor Usmonov (Akmal Rustamov, 46, Elguja Grigalashvili, Nemanya Yovanovich (Andrey Sidorov, 80).
“Istiqlol”: Stoshich, Baranovskiy, Asrorov, Jalilov, Jo‘raboyev, Nazarov, M. Hasan, Tixonoveskiy, Fatxulloyev, Vosiyev, Zenko.
“Qizilqum” klubi Matbuot xizmati.
