Yamaykalik sprinter, Olimpiada o‘yinlarining 8 karra g‘olibi Useyn Bolt hammani chuv tushirgani ma’lum bo‘ldi.
Yakshanba kuni u futbol jamoasi bilan shartnoma imzolab, o‘z orzusiga yetganini e’lon qildi. Hamma o‘zicha taxmin qila boshladi: qaysi klub? uning sevimli «Manchester Yunayted»imi? «Borussiya» Dortmund?
Dushanba kuni Janubiy Afrikaning «Mamelodi Sandauns» klubi Boltning mashg‘ulotlardagi fotosuratini joylashtirib, «futbol endi umuman boshqacha bo‘ladi», deb yozdi. Natijada, hamma buyuk sprinterni JAR Premyer-Ligasida chopib yurishini tasavvur qila boshladi.
Seshanba kuni esa hammasi oydinlashdi. Bolt hech qaysi klub bilan shartnoma imzolamagan. Gap shundaki, u bilan hamkorlik qiladigan Puma kompaniyasi «Mamelodi Sandauns»ga ham homiylik qiladi. Natijada, bu tadbir shov-shuv ko‘tarish va reklama uchun qilingani oydinlashdi.
Ayni paytda Boltning tvitter sahifasida BMT bolalar fondi YUNISEF tomonidan tashkil qilinadigan xayriya o‘yini anonsi turibdi.
10 iyun kuni Bolt baribir «Old Trafford»da maydonga tushadi, ammo faqat bir marta va moziy yulduzlari jamoasi tarkibida.
