UYEFA klublar o‘rtasidagi ikki yirik musobaqa — Yevropa chempionlar ligasi va Yevropa ligasining formatini o‘zgartirayotganini e’lon qildi. Tashkilot rasmiy sayti tarqatgan xabarga ko‘ra, yangi format 2018/19 yilgi mavsumdan boshlab kuchga kiradi.

Demak, yangi formatga ko‘ra, YECHLda 26ta klub to‘g‘ridan-to‘g‘ri guruh bosqichi yo‘llanmasini qo‘lga kiritadi. Oltita jamoa esa saralash bosqichidan so‘ng aniqlanadi. To‘g‘ridan-to‘g‘ri guruh bosqichi yo‘llanmasiga ega bo‘ladigan jamoalar:

YECHL va Yevropa ligasi g‘oliblari — 2ta;
Reytingda yuqori 4ta o‘rinni egallagan mamlakatlarning 4tadan klublari — 16ta;
Reytingda 5 va 6-o‘rinni egallagan mamlakatlarning 2tadan klublari — 4ta;
Reytingda 7-10-o‘rinni egallagan mamlakatlarning 1tadan klublari — 4ta;

Yevropa ligasida to‘g‘ridan-to‘g‘ri guruh bosqichi yo‘llanmasi 17ta klubga beriladi. Qolgan kvotalar saralash bosqichi orqali to‘ldiriladi. Ushbu musobaqadagi asosiy o‘zgarish o‘yinlarning boshlanish vaqtiga tegishli bo‘ldi. O‘yinlar qishki paytda Toshkent vaqti bilan 22:55 va 01:00da, yozda esa 21:55 va 00:00da boshlanadigan bo‘ldi.