«Tottenxem» Angliya premyer-ligasi yangi mavsumining dastlabki bir nechta o‘yinini safarda o‘tkazishga majbur bo‘lishi mumkin. Boisi, "shporlar"ning yangi stadioni mavsum boshlanishiga qadar foydalanishga topshirmasligi mumkin.
Shu sababli "Tottenxem" rahbariyati APLga murojaat qilib, ularning dastlabki 4ta o‘yinini safarga qo‘yib berishlarini so‘rashi mumkin. Bu haqda "shporlar" prezidenti Daniel Levi muxlislar bilan uchrashuvda ma’lum qildi. Odatda APL bunday holatlarda klublarning iltimosini qondiradi. Masalan, ikki yil avval "Enfild" stadioni rekonstruksiya qilinayotgani uchun "Liverpul" mavsumning dastlabki 3ta uchrashuvini safarda o‘tkazgandi.
Eslatib o‘tamiz, "Tottenxem"ning yangi stadioni jamoaning avvalgi arenasi "Uayt Xart Leyn" o‘rnida barpo etilmoqda. Londonliklar o‘zlarining uy o‘yinlarini vaqtincha "Uembli"da o‘tkazib turishibdi.