«Тоттенхэм» Англия премьер-лигаси янги мавсумининг дастлабки бир нечта ўйинини сафарда ўтказишга мажбур бўлиши мумкин. Боиси, "шпорлар"нинг янги стадиони мавсум бошланишига қадар фойдаланишга топширмаслиги мумкин.
Шу сабабли "Тоттенхэм" раҳбарияти АПЛга мурожаат қилиб, уларнинг дастлабки 4та ўйинини сафарга қўйиб беришларини сўраши мумкин. Бу ҳақда "шпорлар" президенти Даниэл Леви мухлислар билан учрашувда маълум қилди. Одатда АПЛ бундай ҳолатларда клубларнинг илтимосини қондиради. Масалан, икки йил аввал "Энфилд" стадиони реконструкция қилинаётгани учун "Ливерпуль" мавсумнинг дастлабки 3та учрашувини сафарда ўтказганди.
Эслатиб ўтамиз, "Тоттенхэм"нинг янги стадиони жамоанинг аввалги аренаси "Уайт Харт Лейн" ўрнида барпо этилмоқда. Лондонликлар ўзларининг уй ўйинларини вақтинча "Уэмбли"да ўтказиб туришибди.