“Bunyodkor” FK bosh direktori Murodjon Aliyev va bosh murabbiy Mirjalol Qosimov yangi mavsum oldidan OAV vakillari bilan uchrashdi.
Murodjon Aliyev “Bunyodkor” jamoasi oldiga qo‘yilgan maqsad va vazifalar haqida gapirib o‘tdi.
- Barchangizni boshlanayotgan yangi mavsum bilan tabriklayman. Bu yilgi chempionatni intizorlik bilan kutayapmiz. Milliy Olimpiya Qo‘mitasi Prezidenti Umidjon Mahamatjonovich va Professional futbol ligasi bosh direktori Omon Fayzullayevich tomonidan qilinayotgan ishlar tahsinga sazovor. Yangi rahbarlar futbolimizni yuqori cho‘qqilarga olib chiqish uchun harakat qilishmoqda. O‘z navbatida “Bunyodkor” futbol klubi ham yangi marralarni ko‘zlagan holda superligaga kirib bormoqda. Bosh murabbiy Mirjalol Qosimov bilan maslahatlashgan holda bu yil ham o‘z tarbiyalanuvchilarimizga ishonch bildirmoqchimiz. Futbol maktabimizdan iste’dodli yigitlar yetishib chiqmoqda. Ularga ishonch bildirib, kelajagimizni mustahkamlashimiz kerak. To‘g‘ri, jamoamizda ba’zi kamchiliklar bor. Ammo bu vaqtinchalik holat. Qiyinchiliklarga sabr bilan yondashib, jamoaning ahil-inoqligi yo‘lida xuddi zanjirdek tizilib turgan yigitlarga rahmat aytaman. “Bunyodkor” mavsumga to‘liq tayyor.
