“Бунёдкор” ФК бош директори Муроджон Алиев ва бош мураббий Миржалол Қосимов янги мавсум олдидан ОАВ вакиллари билан учрашди.
Муроджон Алиев “Бунёдкор” жамоаси олдига қўйилган мақсад ва вазифалар ҳақида гапириб ўтди.
- Барчангизни бошланаётган янги мавсум билан табриклайман. Бу йилги чемпионатни интизорлик билан кутаяпмиз. Миллий Олимпия Қўмитаси Президенти Умиджон Маҳаматжонович ва Профессионал футбол лигаси бош директори Омон Файзуллаевич томонидан қилинаётган ишлар таҳсинга сазовор. Янги раҳбарлар футболимизни юқори чўққиларга олиб чиқиш учун ҳаракат қилишмоқда. Ўз навбатида “Бунёдкор” футбол клуби ҳам янги марраларни кўзлаган ҳолда суперлигага кириб бормоқда. Бош мураббий Миржалол Қосимов билан маслаҳатлашган ҳолда бу йил ҳам ўз тарбияланувчиларимизга ишонч билдирмоқчимиз. Футбол мактабимиздан истеъдодли йигитлар етишиб чиқмоқда. Уларга ишонч билдириб, келажагимизни мустаҳкамлашимиз керак. Тўғри, жамоамизда баъзи камчиликлар бор. Аммо бу вақтинчалик ҳолат. Қийинчиликларга сабр билан ёндашиб, жамоанинг аҳил-иноқлиги йўлида худди занжирдек тизилиб турган йигитларга раҳмат айтаман. “Бунёдкор” мавсумга тўлиқ тайёр.
