Kelayotgan hafta avvalida qit’amiz yashil maydonlarida Chempionlar Ligasi guruh bosqichi 4-tur o‘yinlari o‘tkaziladi. 

O‘zbekiston chempioni “Lokomotiv” bu safar o‘z uyida Qatarning “Al Duhail” jamoasidan revansh olishga urinib ko‘radi.  Ertaga esa mazkur uchrashuv oldidan bir qator rasmiy tadbirlar bo‘lib o‘tadi.  Unga ko‘ra,  soat 12:00da har ikki jamoa rasmiylari ishtirokida o‘yin tashkiliy masalalari muhokama qilinadi.  Soat 13:00da “Al Duhail” jamoasi bosh murabbiyi Jamol Belmadi hamda bir nafar yetakchi futbolchi ishtirokida matbuot anjumani o‘tkaziladi.  Soat 13:20da Andrey Miklyayev hamda “Lokomotiv”ning yetakchi o‘yinchilaridan biri jurnalistlarning o‘yinoldi savollariga javob qaytarishadi.

Soat 15:30da “Lokomotiv,  soat 16:30da esa “Al Duhail” jamoasi o‘yin oldidan rasmiy mashg‘ulot o‘tkazadi.  Har ikki jamoaning ham mashg‘uloti dastlabki 15 daqiqasi OAV vakillari uchun ochiq tarzda o‘tadi.  Barcha turdagi OAV vakillarini ertangi matbuot anjumani hamda rasmiy mashg‘ulotga taklif etamiz.

Ta’kidlab o‘tamiz,  “Lokomotiv” – “Al Duhail” o‘yini 12 mart kuni soat 17:00da “Lokomotiv” stadionida bo‘lib o‘tadi.