O‘zbekiston Milliy olimpiya qo‘mitasi Prezidenti, O‘FA birinchi vise-prezidenti Umid Ahmadjonov tashabbusi bilan yaqin vaqtlar ichida O‘zbekistondagi sport inshootlarida oilaviy sektorlar tashkil etiladi.

Mamlakatimizda bunday sektorlar eng avvalo futbol o‘yinlari o‘tkaziladigan stadionlarda joriy qilinadi. Keyinchalik esa boshqa sport majmualarida, hususan usti yopiq inshootlarda ham musobaqalarni maxsus sektorlarda kuzatish mumkin bo‘ladi. U yerda sport tadbirlarini oilaviy tomosha qilish, madaniy hordiq chiqarish uchun barcha zarur sharoitlar yaratiladi.

Bu mamlakatimizda sportni ommaviylashtirish maqsadida qo‘yilgan navbatdagi qadamlardan biridir. Ana shunday maxsus sektorlarda jamiyatning asosiy negizi hisoblangan oilalar sport musobaqalarini bevosita kuzatish imkoniyatiga ega bo‘ladilar.

Hozirda Toshkentdagi "Lokomotiv" stadionida mana shunday oilaviy sektorlar mavjud. Stadionga o‘z oilasi bilan tashrif buyuradigan muxlislar o‘yinlarini alohida  sektorlarda tomosha qilishi mumkin.