Xabaringiz bo‘lsa, o‘tgan yilning 9 noyabr kuni Malayziya poytaxti Kuala-Lumpurda O‘zbekiston Futbol Federasiyasi prezidenti Umid Ahmadjonov Osiyo Futbol Konfederasiyasi prezidenti Shayx Salmon bin Ibrohim al-Xalifa bilan rasmiy uchrashuv o‘tkazgandi.
Uchrashuvda mamlakatimizda futbolni rivojlantirishga asoslangan turli loyihalar bo‘yicha o‘zaro hamkorlik masalalari muhokama qilinib, Andijon, Qo‘qon va Xorazmda bolalar uchun mo‘ljallangan mini-futbol maydonchalari barpo etilishiga OFK tomonidan mablag‘ ajratilishi bo‘yicha kelishuvga erishilgandi.
Ana o‘sha kelishuvga asosan OFKning futbol maydonlari qurilishi bo‘yicha mutaxassisi Menduh Akyurekli yurtimizga tashrif buyurdi. U Andijon va Qo‘qon shaharlarida bo‘lib, mini-futbol maydonchasi qurilishi uchun ajratilgan hudud bilan tanishdi. Maydonchalarning qurilishi bo‘yicha o‘zining amaliy maslahatlarini berdi. Viloyat futbol federasiyalari vakillari bilan suhbat davomida maydonchalar qurilishi paytida ahamiyat qaratish kerak bo‘lgan o‘ziga xos jihatlar haqida to‘xtalib o‘tdi.
Menduh Akyurekli Andijon va Qo‘qondagi ishlar bilan tanishib bo‘lgach, Xorazmga yo‘l oldi. OFK mutaxassisi u yerda ham maydon uchun ajratilgan hudud bilan tanishib, amaliy maslahatlarini berib o‘tadi.
