UYEFA yevrokuboklar formatiga yana bir bora tuzatishlar kiritishni lozim topdi. Xo‘sh, bu safar qanday yangiliklarga qo‘l urildi? Hammasi hayratlanarli!
Marhamat, «SSF» ma’lumotlari asosida tayyorlangan maqola bilan tanishib, o‘zingiz baho bering. Aytish joiz, bu o‘zgarishlar mavsum-2018|2019dan e’tiboran qo‘llaniladi.
Yevropa Chempionlar Ligasi: top-klublar yanada ko‘proq! Yevroturnirlarda «arzimas o‘yinlar» ko‘pligi xususidagi e’tirozlar yildan-yilga ko‘payotgan edi.
Zero, hozirgi formatga ko‘ra, futboli uncha rivojlanmagan mamlakatlar klublari ham katta sahnada nomdor «og‘ir vaznlilar»ga qarshi o‘ynash imkoniyatiga ega. Demak, keyingi mavsumdan bunday muammoga qisman barham beriladi.
Tasdiqlangan qarorga ko‘ra, 4ta eng kuchli liganing 4tadan kuchli jamoasi to‘g‘ridan-to‘g‘ri CHL guruh bosqichiga qo‘shiladi. Bular - Ispaniya La-ligasi, Germaniya Bundesligasi, Angliya Premyer-ligasi va Italiya «A» seriyasi (hozirgi holatda). Shuningdek, CHL va YELning amaldagi g‘oliblariga ham guruh raundi yo‘llanmasi beriladi.
CHLda Rossiyadan 4ta klub? Ha, keyingi kuzda shunday bo‘lishi mumkin!YAna bir muhim tomoni, UYEFA reytingida 5-6-o‘rinlarni egallagan ikki davlat (ayni holatda - Fransiya va Rossiya)ning 2tadan vakili avtomatik ravishda guruh raundiga qo‘shiladi. Hech qanday kvalifikasiyasiz!
Xullas, jami 26ta klub kurashni asosiy raundda boshlaydi. Boshqacha aytsak, UYEFA jadvalida 7-10-pog‘onalarni egallagan mamlakatlar (hozirgi holatda - Portugaliya, Ukraina, Belgiya va Turkiya) chempionlari ham saralash mashmashalaridan ozod qilinadi.
Turnirning amaldagi g‘olibi yo‘llanmani o‘zi ishtirok etadigan milliy chempionat yakuni bo‘yicha qo‘lga kiritsa, unda reytingning 11-qatoridan joy olgan assosiasiya (hozirgi holatda - Chexiya) chempioni ham guruh bosqichiga to‘g‘ridan-to‘g‘ri qo‘shiladi.
Bordiyu, YEL g‘olibi ham milliy chempionat orqali chiqsa, unda guruh bosqichining yana bir chiptasi reytingda 5-o‘rinni egallagan assosiasiya (hozirgi holatda - Fransiya) vakiliga nasib etadi.
Kvalifikasiya dahshati. Ikki guruh - «Chempionlar yo‘li» va «Ligalar vakillari yo‘li»dagi saralash bosqichining mohiyati o‘zgarmaydi. Lekin kvalifikasiya jarayoniga yana bir raund qo‘shiladi.
Aniqroq aytsak, dastlabki saralash bosqichi mini-turnir tizimida tashkillashtiriladi. E’tiborlisi, u 26 iyun kuniyoq boshlanadi.
CHL-2018|2019 SARALASH TIZIMI
«Chempionlar yo‘li» (4ta yo‘llanma)
Bu guruhda UYEFA reytingida 11-o‘rin va undan pastda joylashgan mamlakatlar chempionlari ishtirok etadi.
Dastlabki raund: 4ta jamoa (mini-turnir tizimida);
Birinchi saralash bosqichi: 33ta jamoa plyus dastlabki raund g‘olibi;
Ikkinchi saralash bosqichi: 3ta jamoa plyus birinchi saralash bosqichining 17ta g‘olibi;
Uchinchi saralash bosqichi: 2ta jamoa plyus ikkinchi saralash bosqichining 10ta g‘olibi;
«Pley-off»: 2ta jamoa plyus uchinchi saralash bosqichining 6ta g‘olibi
«Ligalar vakillari yo‘li» (2ta yo‘llanma)
Bu guruhda reytingda 5-6-o‘rinlardan joy olgan mamlakatlarning uchinchi jamoalari va 7-15-pog‘ona egalari vise-chempionlari o‘ynaydi. Kurash ikkinchi saralash bosqichidan boshlanadi.
Ikkinchi saralash bosqichi: 6ta jamoa;
Uchinchi saralash bosqichi: 5ta jamoa plyus ikkinchi saralash bosqichining 3ta g‘olibi;
«Pley-off»: uchinchi saralash bosqichining 4ta g‘olibi
CHL saralash o‘yinlaridan «yiqilgan» jamoalarning barchasi YEL saralashining ayni tegishli raundiga qo‘shiladi. «Pley-off»dan o‘tolmaganlar esa oldingidek darhol YEL guruh raundiga «sakraydi». Yana bir holat o‘zgarmadi: CHLda bitta assosiasiyadan ko‘pi bilan 5ta jamoa ishtirok etishi mumkin.
CHL-2018|2019 yo‘llanmalari taqsimoti
16ta - UYEFA reytingida 1-4-o‘rinlarni egallagan mamlakatlarga 4tadan
4ta - UYEFA reytingida 5-6-o‘rinlarni egallagan mamlakatlarga 2tadan
2ta - CHL va YELning amaldagi g‘olibiga
4ta - UYEFA reytingida 7-10-o‘rinlarni egallagan mamlakatlarga 1tadan
4ta - «Chempionlar yo‘li» saralash guruhiga
2ta - «Ligalar vakillari yo‘li» saralash guruhiga
Yevromavsum-2018|2019 finallari
Yevropa superkubogi - 2018 yil 15 avgust (Tallinn, Estoniya; «Lillekyula» stadioni)
YEL - 2019 yil 29 may (Boku, Ozarbayjon; «Olimpiyskiy» stadioni)
CHL - 2019 yil 1 iyun (Madrid, Ispaniya; «Metropolitano» stadioni)
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
