Qisqa masofalarga yugurish bo‘yicha Olimpiada va jahonning 11 karra chempioni Useyn Bolt Dortmundding “Borussiya” klubi bilan kelishuvga erishdi.

Yamaykalik sprinter o‘zining  ijtimoiy tarmoqdagi sahifasigi sariq-qora libosda suratga tushganini joylashtirib, “BVB juma kuni tayyor turing” degan yozuvni ilova qilgan.

Shundan keyin Germaniya jamoasi ham o‘zining rasmiy saytida “Bolt kelmoqda” degan xabarni tarqatdi.

Xabarlarga ko‘ra, Useyn Bolt ertaga, 23 mart juma kuni “Borussiya” futbolchilari bilan o‘yin oldi mashg‘ulotlarida ishtirok etadi.

Ular bilan birgalikda bo‘lg‘usi uchrashuvga hozirlik ko‘radi. Yig‘in 23 mart kuni Dortmundning mashhur stadioni “Signal Iduna Park”da Germaniya vaqti bilan 12:30 da boshlanadi.

Ma’lumot o‘rnida, yamaykalik yengil atletikachi Useyn Bolt 8 karra Olimpiada, 11 marta jahon chempionligiga erishgan. Shuningdek, Bolt 100 metr va 200 metr masofalarga yugurish bo‘yicha jahon rekordchisi ham sanaladi.

Darvoqe, sprinter “Borussiya”dan avval “Manchester Yunayted” bilan ham shartnoma tuzishni rejalashtirayotgandi.

Biroq 31 yoshli sportchini Joze Mourinyo o‘z klubida ko‘rishni istamagan chog‘i, Useyn oxiri nemis klubini tanladi.

Eslatib o‘tamiz, avvalroq, Useyn Bolt Janubiy Afrikaning “Mamelodi Sandaunz” klubida o‘ynashi ma’lum bo‘lgandi. Ammo Bolt JARda shunchaki, xayriya o‘yinida ishtirok etgandi xolos.