Ma’lumki, O‘zbekiston futbol Assosiasiyasi hamda O‘zbekiston Respublikasi Oliy va o‘rta maxsus ta’lim vazirligi ikki tomonlama hamkorlikni yanada rivojlantirish uchun o‘zaro memorandum imzolagandi.
Ana shu memorandum asosida yurtimizdagi Oliy ta’lim muassasalari o‘rtasida futbol bo‘yicha “O‘zbekiston futbol Assosiasiyasi Kubogi” musobaqalarini o‘tkazishga kelishib olingandi.
O‘FAning tasdiqlangan rejasiga asosan 27 martdan 5 aprelga qadar Samarqandda «O‘FA Kubogi»ning birinchi bosqich o‘yinlari bo‘lib o‘tadi. Unda viloyatdagi sakkizta Oliy ta’lim muassasalari jamoalari ikki guruhga bo‘lingan holda o‘zaro kuch sinashishadi. Bular, “A” guruhida Samarqand davlat arxitektura qurilish institutining “SamDAQI”, Samarqand davlat universiteti Jismoniy madaniyat fakultetining “SamDU-1”, Toshkent axborot texnologiyalari universiteti Samarqand filialining “TATU”, Samarqand qishloq xo‘jalik institutining “SamQXI”, “V” guruhida Samarqand davlat universiteti talabalari termasining “SamDU-2”, Samarqand iqtisodiyot servis institutining “SamISI”, Samarqand davlat chet tillar institutining SamDCHTI” hamda Samarqand tibbiyot institutining “SamMI” jamoalaridir.
Talabalar Samarqand shahridagi “Olimpiya” nomli IBO‘SM hamda BO‘SM-2 maydonlarida kurash olib borishadi. Guruh o‘yinlari 27 martdan 1 aprelga qadar davom etadi, 3 aprelda yarim final, 5 aprelda esa final uchrashuvi o‘tkazilishi belgilangan.
Turnir g‘olibi aprel oyining ikkinchi yarmida aynan Samarqandda tashkillashtiriladigan ikkinchi bosqichga yo‘llanma oladi. Musobaqa qonun-qoidasiga muvofiq ikkinchi bosqich to‘rt mintaqada tashkillashtiriladi – Namangan, Samarqand, Urganch va Toshkent shaharlarida. Samarqand mintaqasida mezbonlardan tashqari Qashqadaryo, Navoiy va Qashqadaryo viloyatlari g‘oliblari ishtirok etishadi.
Qolgan uch mintaqa qatnashchilari:
Namangan shahrida – Namangan, Andijon, Farg‘ona viloyatlari;
Urganch shahrida – Xorazm, Buxoro viloyatlari va Qoraqalpog‘iston Respublikasi;
Toshkent shahrida – Toshkent, Sirdaryo, Jizzax viloyatlari va Toshkent shahar musobaqalari g‘oliblari.
“O‘FA Kubogi” bahslari orqali talabalar o‘z imkoniyatlarini chamalab olishlari bilan bir qatorda ularning bo‘sh vaqtlarini mazmunli o‘tkazish ham ta’minlanmoqda. Qolaversa, musobaqa yoshlarni ma’naviy boy va jismonan sog‘lom etib tarbiyalash, ularning qalbida Vatanga sadoqat, o‘ziga ishonch, sportga muhabbat tuyg‘ularini uyg‘otishga ham xizmat qilishi bilan ham ahamiyatlidir.
