Futbol bo‘yicha Xorvatiya chempionatining uchinchi divizion doirasidagi “Marsoniya” va “Slavoniya” jamoalari o‘rtasidagi o‘yinda noxush voqea sodir bo‘ldi.

Gap shundaki, zarbani ko‘kragi bilan to‘xtatgan mezbonlar a’zosi Bruno Boban maydonning o‘zida jon bergan. Bu haqda “HRT Sport” nashri xabar berdi.

Xabarda aytilishicha, voqea o‘yinning 15-daqiqasida sodir bo‘lgan. Bobanning ko‘kragiga kuchli zarba tekganidan so‘ng, u maydonga ag‘dariladi.

To‘p orqali yo‘naltirilgan kuchli zarba natijasida maydonga yiqilgan futbolchiga birinchi bo‘lib tibbiy yordamni klub shifokori beradi, birozdan keyin esa tez tibbiy yordam xodimlari stadionga yetib kelishadi.

Biroq, ularning bergan tibbiy yordamlari ham 25 yoshli Bobanni asrab qola olmagan va u maydonning o‘zida jon bergan.

Uning aynan nima sabab bilan vafot etgani haqida hozircha hech qanday ma’lumot berilmadi.

Ma’lumot uchun, Bruno Boban “Zagreb”, “Slavoniya” klublaridagi faoliyati bilan mashhur bo‘lib, u joriy mavsum 12 ta gol urishga erishgandi.