Avval xabar berganimizdek, 27-29 mart kunlari poytaxtning “Yoshlik” sport majmuasida O‘zbekiston futbol Assosiasiyasining taqvim rejasiga asosan 16 yoshli qizlar o‘rtasida futzal bo‘yicha Respublika turniri bo‘lib o‘tdi.
Musobaqa qonun-qoidasiga binoan, turnir 12 va 14 yoshlilar o‘rtasida ham tashkillashtirilgan edi. Samarqandda uyushtirilgan musobaqada uchta jamoa ishtirok etgan va unda maydon egalari g‘olib deb topilgan. Qarshida o‘tgan 14 yoshlilar turnirida esa 7 jamoa orasida qarshiliklar yakka peshqadamlik qilishdi. Va nihoyat, taqvim rejasining so‘nggi turniri – 16 yoshlilar musobaqasi ham yakuniga yetdi. Beshta jamoa – Toshkent, Andijon, Jizzax, Namangan viloyatlari hamda Toshkent shahar vakillari qatnashgan turnirda bosh sovrin andijonliklarga nasib yetdi.
Bahodir Abdullayev ustozligidagi Andijon viloyati Xo‘jaobod tumani Bolalar va o‘smirlar sport maktabi (direktori Shavkat Muhitdinov) tarbiyalanuvchilari o‘tgan yili viloyatda tashkil etilgan xotin-qizlar futbol musobaqasida muvaffaqiyat qozongan, biroq boshqa hech qanday turnirda ishtirok etmagan edi. O‘zbekiston futbol Assosiasiyasining taqvim rejasiga asosan ilk bor o‘tkazilayotgan mazkur turnirning dastlabki bosqichi viloyatlarda o‘tishi, g‘oliblari Respublika final bahslariga yo‘llanma olishi ko‘zda tutilgan edi. Musobaqa barcha viloyatlarda o‘tdi, deyish qiyin. Ammo Andijonda tashkillashtirilgan turnirda 7ta jamoa qatnashgan, xo‘jaobodliklar ushbu turnir g‘olibi sifatida poytaxtga safar etgan edi.
Andijon viloyati vakillari Toshkent shahar va viloyati jamoalarini yengdi, namanganliklar bilan durang o‘ynadi, jizzaxliklar esa o‘yinga kechikib kelgani uchun ular ustidan texnik g‘alabaga erishdi va yakunda chempion deb topildi. Ikkinchi o‘rin Namangan, uchinchi o‘rin esa Toshkent shahar yosh futbolchi qizlariga nasib etdi.
Namangan jamoasi
Toshkent shahar jamoasi
Uchrashuvlarda qayd etilgan natijalar:
27 mart
Toshkent sh. – Toshkent v. – 7:2
Andijon – Namangan – 5:5
Jizzax – Andijon - -:+
Toshkent v. Namangan – 5:1
28 mart
Toshkent v. – Andijon – 2:3
Jizzax – Toshkent sh. – 0:8
29 mart
Jizzax – Namangan – 0:10
Toshkent sh. – Andijon – 1:3
Toshkent v. – Jizzax – 2:1
Namangan – Toshkent sh. – 4:3.
Andijon – 10, namangan – 7, Toshkent viloyati jamoasi 6 ochko to‘pladi.
