O‘zbekiston futbol assosiasiyasi hamda Professional futbol ligasi tomonidan yurtimizda futbolni rivojlantirish, milliy chempionatimiz saviyasini oshirib, stadionlarga muxlislarni yanada ko‘proq jalb qilish maqsadida bir qator chora-tadbirlar amalga oshirilmoqda.
Jumladan, milliy chempionatimiz bahslarini tomosha qilish uchun stadionlarga tashrif buyurayotgan muxlislarni xursand qilish, ayniqsa, yosh bolakaylarda futbolga bo‘lgan mehrni yanada oshirish maqsadida, turli aksiyalar, tadbirlar o‘tkazish rejalashtirilgan.
Ushbu maqsadda stadionlarda turli attraksionlar, ovqatlanish shahobchalari, futbolga oid esdalik sovg‘alar, sport liboslari sotiladigan do‘konlar barpo qilinadi.
Shuningdek, Superliganing 7-turidan boshlab har turda uchrashuvlarni tomosha qilish uchun stadionga kelgan eng faol muxlislarga O‘zbekiston futbol assosiasiyasi tomonidan Superliga klublari futbolchilarining imzosi tushirilgan bepul to‘plar taqdim qilib boriladi.
Muxlislar ushbu to‘plarni klubning mashhur futbolchilaridan qabul qilib olib, ular bilan birga suratga tushish imkoniyatiga ham ega bo‘lishadi.
Superliga bahslarini tomosha qilish uchun stadionlarga tashrif buyuring, o‘z sevimli jamoangizni qo‘llab-quvvatlang va ajoyib futbol to‘plariga ega bo‘ling!
