O‘FAda bo‘lib o‘tgan yig‘ilishda PFL rahbari Omon G‘ofurov va futbolni rivojlantirish boshqarmasi vakillari ishtirok etdilar.
O‘FAning Kiko Zunigani O‘zbekistonga olib kelishidan asosiy maqsad, Qashqadaryo, Surxondaryo, Samarqand va Jizzax shaharlaridagi mavjud imkoniyatdan foydalanish, murabbiylar malakasini oshirish, bolalar o‘rtasida tizimli musobaqalarni yo‘lga qo‘yishdir.
Ko‘p yillar davomida "Real Sosyedad" sharafini himoya qilgan Ispaniya Kubogi sohibi "Atletiko" va "Real" Madrid akademiyalarida faoliyat yuritgan.
Omon G‘ofurov O‘FA va PFLning istiqbolli rejasi bilan tanishtirib chiqar ekan, Kiko Zunigadan chekka-chekka qishloqlarda ham futbolni markazlarda bo‘lgani kabi yuqori sifatdagi bilimlarni berishimiz kerakligini takidlab o‘tdi.
Bundan avval ham O‘zbekistonda bo‘lgan mutaxassis O‘zbekistonda iste’dod egalarining ko‘pligini takidlab o‘tdi. Faqat ular bilan ishlash lozimligi, buning uchun avval o‘ziga biriktirilgan viloyatlar bilan yaxshilab tanishib chiqishi kerakligini aytdi.
"Men avvalo hududlarni o‘rganib chiqishim kerak. Bolalarni futbolga talpinayotganliklarini ko‘rib turibman. O‘zbekistonga shunchaki ishlagani kelmadim. Agar terma jamoangiz Qatarda bo‘lib o‘tadigan mundial yo‘llanmasini qo‘lga kiritsa, men ham shu loyihada ishtirok etgan kishi sifatida ishimdan qanoat xosil qilgan bo‘laman. Aks holda o‘z ishimni qoniqarsiz baholayman. Vohada ishga kirishdim. Biroz vaqt o‘tgach o‘z dasturimni amalga oshirishga kirishaman", - deydi ispaniyalik mutaxassis.
Kiko Zuniga nafaqat bolalar futboli bilan, balki o‘smirlar va yoshlar terma jamoalarining bosh murabbiylariga hududdagi seleksioner murabbiy sifatida ham o‘z yordamini beradi va O‘FA tomonidan o‘tkaziladigan o‘quv seminarlarida o‘z dasturlari bilan chiqish qilib boradi.
