ЎФАда бўлиб ўтган йиғилишда ПФЛ раҳбари Омон Ғофуров ва футболни ривожлантириш бошқармаси вакиллари иштирок этдилар.

ЎФАнинг Кико Зунигани Ўзбекистонга олиб келишидан асосий мақсад, Қашқадарё, Сурхондарё, Самарқанд ва Жиззах шаҳарларидаги мавжуд имкониятдан фойдаланиш, мураббийлар малакасини ошириш, болалар ўртасида тизимли мусобақаларни йўлга қўйишдир.

Кўп йиллар давомида "Реал Сосьедад" шарафини ҳимоя қилган Испания Кубоги соҳиби "Атлетико" ва "Реал" Мадрид академияларида фаолият юритган.

Омон Ғофуров ЎФА ва ПФЛнинг истиқболли режаси билан таништириб чиқар экан, Кико Зунигадан чекка-чекка қишлоқларда ҳам футболни марказларда бўлгани каби юқори сифатдаги билимларни беришимиз кераклигини такидлаб ўтди.

Бундан аввал ҳам Ўзбекистонда бўлган мутахассис Ўзбекистонда истеъдод эгаларининг кўплигини такидлаб ўтди. Фақат улар билан ишлаш лозимлиги, бунинг учун аввал ўзига бириктирилган вилоятлар билан яхшилаб танишиб чиқиши кераклигини айтди.

"Мен аввало ҳудудларни ўрганиб чиқишим керак. Болаларни футболга талпинаётганликларини кўриб турибман. Ўзбекистонга шунчаки ишлагани келмадим. Агар терма жамоангиз Қатарда бўлиб ўтадиган мундиал йўлланмасини қўлга киритса, мен ҳам шу лойиҳада иштирок этган киши сифатида ишимдан қаноат хосил қилган бўламан. Акс ҳолда ўз ишимни қониқарсиз баҳолайман. Воҳада ишга киришдим. Бироз вақт ўтгач ўз дастуримни амалга оширишга киришаман", - дейди испаниялик мутахассис.

Кико Зунига нафақат болалар футболи билан, балки ўсмирлар ва ёшлар терма жамоаларининг бош мураббийларига ҳудуддаги селекционер мураббий сифатида ҳам ўз ёрдамини беради ва ЎФА томонидан ўтказиладиган ўқув семинарларида ўз дастурлари билан чиқиш қилиб боради.