«Los-Anjeles Geleksi» klubining shvesiyalik hujumchisi Zlatan Ibragimovich Amerika televideniyesining mashhur kanallaridan biri - ABCda taniqli boshlovchi Jimmi Kimmel shousi mehmoni bo‘lib, JCH-2018da ishtirok etish niyatini bildirdi.
Ko‘rsatuv shu qadar muvaffaqiyatli chiqdiki, uni YouTube orqali bir sutkada 4 mln. marta tomosha qilishdi.
Izoh shunga yarasha - «Aslida Jimmi mehmon, Zlatan esa mezbon bo‘ldi!» Bu shved yulduzining AQSHda o‘zini xuddi uyidagidek his etayotganiga ishora. Marhamat, shou lavhalari bilan tanishing.
«Shvesiyani dunyo xaritasiga olib kirdim»
- Los Angeles Times nashrining maxsus sahifasi borki, xohlovchi kishi u orqali butun shaharga murojaat qilishi mumkin. Xususan, sen kelgan kuning shahar bilan o‘ziga xos tarzda salomlashding: «Qimmatli Los-Anjeles! Arzimaydi. Zlatan».
- 2 yilcha Los-Anjeles varianti ustida bosh qotirdim. Shaharga munosib sovg‘a bilan kelishni o‘ylagandim. Xullas, yakunda o‘zimdan ko‘ra, munosibroq sovg‘a topolmadim. Mana, o‘zim keldim, arzimaydi.
- Ajablanarli yechim. Biroq an’anaviy shved fuqarosiga uncha o‘xshamaysan. Har holda, shvedlar tabiatan maqtanchoq emaslar.
- To‘g‘ri, hamyurtlarim o‘ta mulo-yim kishilar.
- Shuning uchun sendan mamlakatdan chiqib ketishni so‘radilarmi?
- Aslo! Ha, shvedga o‘xshamayman. Ammo Shvesiyani dunyo xaritasiga olib kirdim!
«Bu zilzila emas, men...»
- «Geleksi» safidagi ilk uchrashuvda g‘aroyib gol urding. Buni ham oldindan rejalashtirganmiding?
- Oldindan shunday gol urishni his etgandim. Aytgancha, men kelgan kuni shaharda zilzila bo‘lganidan xabarim bor. U zilzila emasdi, shunchaki, Los-Anjeles zaminiga qadam qo‘ygandim. Golga to‘xtalsak, kimligimni bildirib qo‘yishni istadim.
- Aslida deyarli barcha jamoalarda debyutni gol bilan nishonlagansan, to‘g‘rimi?
- Ha, lekin oddiy gollar bilan. Bunisi o‘zgacha. Qolaversa, g‘alabani ta’minlagan «dubl» qayd etdim.
- Senga nisbatan umumiy munosabatdan hayratlanish mumkin. Deylik, Chikagoga yo‘l olganingda katta shov-shuv ko‘tarilibdi.
- Yevropada futbol - muhim voqelik. Shu bois, qayerga bormayin, odamlar aqlini shoshirib qo‘yardim. Amerikada esa munosabat boshqachaligini aytishgandi. Xususan, Los-Anjeles ko‘chalarida emin-erkin sayr qilish mumkinligiyu, hech kim menga e’tibor qaratmasligini ta’kidlashgandi.
Biroq amalda aksi bo‘lib chiqdi. Aslida bunga o‘zim sababchiman. Qanday o‘ynashimni nazarda tutsak, yuksak e’tiborning ajablanadigan tomoni yo‘q...
- Boshqa sport turlariga munosabating qanday? Masalan, o‘zingni professional basketbolchi sifatida tasavvur eta olasanmi?
- O‘ylashimcha, o‘zimga qattiq ishonishimni allaqachon sezdingiz. Qanday ish bilan shug‘ullanishimdan qat’iy nazar, hech kim uni takrorlay olmaydi. Taqdir ekan, futbolni tanladim. Shunday ekan, boshqa sport turlari ishqibozlaridan uzr so‘rayman.
- Jamoadoshlaringni ranjitib qo‘yishing mumkinligi sal bo‘lsada, o‘ylantiradimi? Axir ular doimo soyangda qolib ketishadi...
- Yo‘q-yo‘q. Chunonchi, ularni super-yulduzlarga aylantiraman, xuddi o‘zim singari.
«Sokker? Yo‘Q. Biz uchun futbol...»
- Sen va JCH-2018ga bog‘liq mish-mishlar avjiga chiqmoqda. Bo‘lajak mundialda qatnashasanmi?
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
