Futbol bo‘yicha jahon chempionati ishtirokchilari haqidagi turkum maqolalarni saytimizda e’lon qilishda davom etamiz. Navbat KONKAKAF mintaqasi yetakchisi Meksikaga!

Laqabi: «El Tricolor» («uchranglilar»), «yashillar».

Konfederasiya: KONKAKAF.

Bosh murabbiy: Xuan Karlos Osorio.

Sardor: Rafael Markes.

Eng ko‘p o‘yin o‘tkazgan futbolchi: Klaudio Suares (177).

To‘purar: Xavyer Ernandes (48).

Uy stadioni: «Asteka».

FIFA reytingida: 33-o‘rin (2018 yil 12 aprel).

Eng yuqori o‘rin: 4 (1998 yil fevral-iyun, 2006 yil may-iyun).

Eng past o‘rin: 40 (2015 yil iyul)

Ilk o‘yin: Gvatemala – Meksika 2:3 (Gvatemala, Gvatemala; 1923 yil 1 yanvar).

Eng yirik g‘alaba: Meksika – Bagama orollari 13:0 (Toluka, Meksika; 1987 yil 28 aprel).

Eng yirik mag‘lubiyat: Angliya – Meksika 8:0 (London, Angliya; 1961 yil 10 may).

Jahon chempionatidagi ishtiroki: 15 (chorak final, 1970, 1986 yillar)

KONKAKAF oltin kubogi g‘olibi: 10 marta.

Konfederasiyalar kubogi: 1 ta oltin, 1 ta bronza.

Amerika kubogi: 2 ta kumush, 3 ta bronza.

Tanishuv

Meksikaga ilk futbolni 20-asr boshlarida konlarda ishlaydigan ingliz ishchilari va fuqarolik urushi tufayli borib qolgan ispan qochoqlari olib kirishgan. 1902 yildan boshlab mamlakat chempionati o‘tkazib kelinsa-da, unda asosan chet ellik muhojirlar to‘p surardi. Meksikaliklardan tashkil etilgan ilk klub «Amerika» 1916 yilda Mexiko universiteti talabalari tomonidan tuzilgan va Meksika terma jamoasi sifatida ilk o‘rtoqlik o‘yinlarida ishtirok etgan. Mamlakat hududida yuz bergan turli inqiloblar futbolning bir maromda rivojlanishiga salbiy ta’sir ko‘rsatgan.

Meksika futbol federasiyasi 1927 yilga kelib tashkil etildi va uch yildan so‘ng terma jamoa ilk jahon chempionatida ishtirok etdi. Shu kungacha chempionatlarda umumiy hisobda 15 marta qatnashgan «El Tricolor» g‘olib bo‘lmagan jamoalar orasida chempionatda ishtirok etish bo‘yicha eng yaxshi ko‘rsatkichga ega. Meksika ikkita jahon chempionatiga mezbonlik qilgan bo‘lib, Mexikodagi «Asteka» stadioni yaqin-yaqingacha ikkita jahon chempionati finali o‘tkazilgan yagona stadion maqomida edi.

Natija

Meksikaliklar jahon chempionatidagi ilk yaxshi natijani 1970 yilda qo‘lga kiritgan. O‘shanda guruh bahslarida SSSR bilan durang o‘ynab, Salvador va Belgiyani mag‘lubiyatga uchratishadi va ilk bor pley-off bahslariga yo‘llanma olishadi.

KONKAKAF mintaqasining yetakchi va eng sovrindor terma jamoasi hisoblangan yashillar shu kungacha qit’a miqyosida o‘tkazilgan 21 ta turnirning 10 tasida g‘alaba qozongan. Uchranglilar hisobida konfederasiyalar kubogining oltin va bronza medallari ham bor.

Meksika terma jamoasi 1993 yildan KONMEBOL mintaqasida o‘tkaziladigan Amerika kubogida ishtirok etib kelmoqda.  Mazkur turnirda 2 marta kumush, 3 marta bronza medallarini qo‘lga kiritgan.

Rafael Markes Meksika terma jamoasining yetakchilaridan biri

Ikkinchi mezbonlik

1986 yili Kolumbiyada o‘tkazilishi lozim bo‘lgan jahon chempionati moliyaviy qiyinchiliklar tufayli Meksikaga ko‘chirildi. O‘shanda terma jamoani ilk bor yevropalik mutaxassis Bora Milutinovich boshqarardi. Meksikaliklar uchun ushbu chempionat birinchi va hozircha yagona mag‘lubiyatsiz turnir bo‘lib qolmoqda.

Guruh o‘yinlarida Belgiya va Iroqni mag‘lubiyatga uchratgan (2:1 va 1:0) meksikaliklar nimchorak finalda Bolgariyani taslim etishdi – 2:0! Mazkur bahsda qaychi uslubida gol kiritgan Manuel Negrete haligacha jahon chempionatlaridagi eng chiroyli gol sohiblaridan biri sifatida e’tirof etiladi.

Chorak finalda Germaniyaga duch kelgan Milutinovich shogirdlari penaltilar seriyasiga ko‘ra yarim finaldan mosuvo bo‘lishdi. Jahon chempionatida porlashi kutilgan terma jamoa yulduzi «Real» (Madrid) klubi a’zosi Ugo Sanches ham turnir davomida o‘zini ko‘rsata olmadi.

1990 yilgi jahon chempionatini FIFA taqiqi tufayli o‘tkazib yuborgan Meksika keyingi barcha chempionatlarda muntazam qatnashib kelmoqda.

Asosiy yulduz

Tarixda Meksikaning kuchli futbolchilari yetarlicha bo‘lgan. Raqib jarima maydonigacha bora oladigan darvozabon Xorxe Kampos, uning davomchisi Osvaldo Sanches, yaqin-yaqingacha terma jamoa to‘purari bo‘lgan Xared Borxetti va albatta «Amerika»ning afsonaviy hujumchisi Kuautemok Blanko.

Bugungi kunda ham yuqoridagi yulduzlarning davomchilari yetarli. Terma jamoani 15 yillik yetakchisi Rafael Markessiz tasavvur qilish qiyin. Meksikaliklar terma jamoasi bilan to‘rtta jahon chempionatida ishtirok etgan himoyachini afsonaviy Ugo Sanches bilan bir qatorga qo‘yishadi. Shu kungacha terma jamoa libosida 143 marta maydonga tushgan «Barselona»ning sobiq himoyachisi jahon chempionatining final qismida 16 ta o‘yinda ishtirok etgan.

Biroq bugungi kun yulduzi Chicharito laqabi bilan mashhur Xavyer Ernandes sanaladi. U mashhurlik borasida har qanday meksikalikni ortda qoldiradi: «Instagram»dagi sahifasini 4,4 mln. obunachi kuzatib boradi. Uning Yevropadagi klublari futbolchining libosini Meksikada sotish orqali katta daromad olmoqda. «MYU» safida Yevropadagi debyut mavsumidayoq 20 ta gol kiritgan Chicharito zaxiradan tushib gol kiritish bo‘yicha Ule Gunnar Sulsherni ham ortda qoldirgan edi.

2015 yilda Liverkuzenning «Bayer» klubiga o‘tgan futbolchi ilk mavsumdayoq 17 gol bilan muxlislarni xursand qildi. Ammo keyingi mavsum aspirinchilarga ancha omadsiz keldi va bu Chicharitoning sermahsulligiga ham ta’sir qildi. U Angliyaning «Vest Xem»iga o‘tib ketdi. Klub boshqaruviga Devid Moyes kelgach, meksikalik futbolchi uning asosiy quroliga aylandi. Klubdagi faoliyatidan farqli ravishda terma jamoada muntazam o‘ynayotgan futbolchi yaqinda milliy terma jamoaning eng yaxshi to‘purariga aylandi. U Rossiya maydonlarida meksikaliklarning asosiy umidi sifatida baholanmoqda.

Saralash o‘yinlari

Jahon chempionati saralash bahslari KONKAKAF mintaqasida 5 bosqichda o‘tkaziladi. Meksika kuchli jamoalar qatorida saralashning 4-bosqichidan kurashga qo‘shildi. Katta ustunlik bilan so‘nggi bosqichga yetib kelgan yashillar Kosta-Rika, AQSH, Honduras, Panama hamda Trinidad va Tobagoni ortda qoldirib, so‘nggi bahs oldidan raqiblaridan 5 ochko ilgarilab ketdi va muddatidan oldin Rossiyaga borish huquqini qo‘lga kiritdi.

 So‘nggi beshta o‘yin 

Raqiblar

Rossiya maydonlarida «F» guruhidan o‘rin olgan Meksika amaldagi jahon chempioni Germaniya, Italiyadek kuchli jamoani jahon chempionatidan mosuvo qilgan «shved vikinglari» va Janubiy Koreya bilan bellashadi