Xabaringiz bor, O‘zbekiston futbol assosiasiyasi yurtimizda futbolni rivojlantirish va yangi bosqichga olib chiqish maqsadida bir qator futboli rivojlangan xorijiy mamlakatlar futbol assosiasiyalari bilan yaqin hamkorlikni yo‘lga qo‘yib kelmoqda.
O‘zbekiston futbol assosiasiyasi 1-vise-prezidenti Umid Ahmadjonov bir qator mamlakatlar futbol rahbarlari bilan uchrashuvlar o‘tkazib, xorijiy mamlakatlar tajribasini yurtimizda ham yo‘lga qo‘yish borasida ko‘plab islohotlarni amalga oshiryapti.
Ana shunday chora-tadbirlar natijasida Italiya futbol assosiasiyasi bilan ham hamkorlik bo‘yicha kelishuvga erishildi. Jumladan, Italiya murabbiylari assosiasiyasi prezidenti va Italiya futbol federasiyasi murabbiylar maktabi rahbari Renso Ulivyeri O‘FA bilan hamkorlik qilish, o‘zbekistonlik murabbiylar salohiyatini oshirish hamda O‘zbekistonda futbolning rivojiga hissa qo‘shishga tayyor ekanini ma’lum qildi.
Janob Ulivyeri shu yilning iyul oyida O‘zbekistonga 2 nafar murabbiy intsruktorlar bilan tashrif buyurib, yoshlar jamoalarida mashg‘ulot o‘tkazish tartibi, uchrashuvlarga taktik va jismoniy tayyorgarlik ko‘rish masalalari bo‘yicha o‘quv kurslari tashkil qilishi rejalashtirilgan.
