Ispaniya chempionati 34-turi doirasida «Barselona» hamda «Vilyarreal» o‘rtasidagi qoldirilgan uchrashuv o‘z poyoniga yetdi.
Mezbonlar ustozi Ernesto Valverde mazkur bahsda aralash tarkibni tushirgan bo‘lsada o‘yin ularning nazorati ostida o‘tdi deyish mumkin va hisob ham shunga yarasha bo‘ldi – 5:1.
Dastlab uchrashuvning 10-daqiqasida Usmon Dembele birin ketin raqiblarini aldab o‘tib chap oyoqda darvozaga zarba yo‘lladi. Darvozabondan qaytgan to‘pni esa Koutinyo darvozaga joylab qo‘yib, hisobni ochdi.
Oradan besh daqiqa o‘tar-o‘tmas Paulinyo Lyuka Dinning ajoyib uzatmasidan so‘ng bo‘sh qolgan darvozani ishg‘ol qilishda qiynalmadi.
Taym oxirida esa Andres Inyesta jamoadoshi Lionel Messiga superuzatmani amalga oshirdi va argentinalik futbolchi hisobni yiriklashtirdi.
Ikkinchi bo‘limda o‘yin tempi ancha sustlashgandek bo‘ldi. Asosan «Vilyarreal» hujumlarga zo‘r berdi va buning natijasida 54-daqiqaga kelib Nikola Sansone hisobni qisqartirdi.
Bu goldan «Barselona» o‘yin nazoratini yana o‘z qo‘liga olishga intildi, tarkibda bir-qator o‘zgarishlar amalga oshdi.
87-daqiqada Ivan Rakitich ikki-uch raqib futbolchisini aldab jarima maydoniga yorib kirdi va ajoyib tarzda Dembeleni to‘p bilan ta’minladi. Usmon esa osongina darvozani ishg‘ol qilib qo‘ydi.
Hakam tomonidan qo‘yish berilgan so‘nggi daqiqalarda «Barsa» yana bir qarshi hujumga o‘tib ketdi va yana Dembele tezkorligi evaziga qochib ketib, to‘pni darvozabon ustidan tashlab qo‘yib yakuniy hisobni ta’minladi.
Ispaniya primerosi. 34-tur
Barselona – Vilyarreal – 5:1 (3:0)
Gollar: 1:0 – 11 Koutinyo, 2:0 – 16 Paulinyo, 3:0 – 45 Messi, 3:1 – 54 Sansone, 4:1 – 87 Dembele, 5:1 – 90 Dembele.
Barselona: Sillessen, Pike (Mina, 80), Din, Nelson Semedu, Vermalen, Inyesta (Suares, 61), Buskets (Rakitich, 65), Koutinyo, Paulinyo, Dembele, Messi.
Vilyarreal: Asenxo, Alvaro Gonsales, Kosta, Mario Gaspar, Ruis, Rodri Ernandes, Trigeros (Xavi Fuego, 57), Fornals, Kastilyexo, Cherishev (Sansone, 46), Bakka (Unal, 70).
Ogohlantirishlar: Ruis (44), Xavi Fuego (72), Mario Gaspar (82).
