O‘zbekistonda futbolni eng dastlabki bo‘g‘ini — bolalar futbolidan boshlab isloh qilishni maqsad qilgan O‘FA O‘zbekiston Respublikasining barcha hududlarini ichidan o‘rganishni maqsad qilgan.
Shu munosabat bilan O‘FA Futbolni rivojlantirish boshqarmasida yangi ishchi guruh tuzildi. Ayni paytda guruh vakillari O‘FAning birinchi vise-prezidenti Umid Ahmadjonovning topshirig‘i bilan ayni paytgacha Qoraqalpog‘iston Respublikasi, Xorazm viloyatlari va vodiyda bo‘lib qaytdilar. 9 may kuni ishchi guruh Jizzaxda bo‘ldi.
Quvonarlisi shundaki, Jizzaxda 2003-2006 yillar oralig‘ida tug‘ilgan futbolchilar o‘rtasida viloyat birinchiligi start olishi arafasida. Aslida O‘FAning maqsadi ham shunday, barcha viloyatlarda o‘z chempionatlarini ishga tushirish. Boshqarma a’zolari Jizzax, Paxtakor, Sharof Rashidov va G‘allaorol tumanlarida bo‘ldilar.
Viloyatda futbol klublari asosan BO‘SMlar orqali shakllanadi. Tabiiyki, bu tumanlardagi bolalarni ehtiyojini qondira olmaydi. Shuning uchun sentyabr oyidan e’tiboran barcha hududlardagi maktablarning terma jamoalari shakllantiriladi va viloyat futbol federasiyasi tomonidan nazoratga olinadi. Shu yo‘l orqali O‘FA Jizzaxning chekka qishloqlaridan ham chiqadigan iste’dodlarni payqash imkoniyatiga ega bo‘ladi.
Futbolni rivojlantirish boshqarmasi vakillari 10 may kuni Samarqandda bo‘lsalar, 11 mayda Qashqadaryo viloyatining tumanlari bilan yaqindan tanishadilar.
