O‘zbekiston Respublikasi Prezidentining 2018 yil 16 martdagi PQ-3610-sonli “Futbolni yanada rivojlantirish chora-tadbirlari to‘g‘risida”gi qarori bandlariga asosan, respublikamizda bolalar futbol akademiyalarini tashkil etish yuzasidan O‘zbekiston futbol assosiasiyasida bir qator ishlar amalga oshirilmoqda.
Yangi tashkil etilayotgan futbol akademiyalariga bolalarning futbolga bo‘lgan ishtiyoqini oshirish, professional futbolchilarni bosqichma-bosqich tayyorlash va O‘zbekiston milliy terma jamoalariga nomzodlarni yetkazib berish, o‘zbek futbolini yangi bosqichga olib chiqish vazifalari yuklatiladi.
14-16 may kunlari O‘zbekiston futbol assosiasiyasining majlislar zalida hududiy futbol akademiyalarining direktorlik lavozimlariga nomzodlar bilan suhbat tashkil qilinadi. Suhbat davomida akademiyalarning ish faoliyatini tashkil etish bo‘yicha rejalar, professional futbolchilarni yetishtirish borasidagi amalga oshirilishi kutilayotgan yangi chora-tadbirlar, futbol akademiyalarida tatbiq qilinadigan yangi o‘qitish tizimlari muhokama qilinadi.
