Ўзбекистон Республикаси Президентининг 2018 йил 16 мартдаги ПҚ-3610-сонли “Футболни янада ривожлантириш чора-тадбирлари тўғрисида”ги қарори бандларига асосан, республикамизда болалар футбол академияларини ташкил этиш юзасидан Ўзбекистон футбол ассоциациясида бир қатор ишлар амалга оширилмоқда. 

Янги ташкил этилаётган футбол академияларига болаларнинг футболга бўлган иштиёқини ошириш, профессионал футболчиларни босқичма-босқич тайёрлаш ва Ўзбекистон миллий терма жамоаларига номзодларни етказиб бериш, ўзбек футболини янги босқичга олиб чиқиш вазифалари юклатилади. 

14-16 май кунлари Ўзбекистон футбол ассоциациясининг мажлислар залида ҳудудий футбол академияларининг директорлик лавозимларига номзодлар билан суҳбат ташкил қилинади. Суҳбат давомида академияларнинг иш фаолиятини ташкил этиш бўйича режалар, профессионал футболчиларни етиштириш борасидаги амалга оширилиши кутилаётган янги чора-тадбирлар, футбол академияларида татбиқ қилинадиган янги ўқитиш тизимлари муҳокама қилинади.