Мадриднинг «Реал» клубига кўплаб юлдуз футболчиларга қизиқиш билдираётгани ҳақида хабарлар тўхтамаяпти. 7 июнь куни клубда президентлик сайловлари бўлиб ўтади ва ҳар икки номзод — Флорентино Перес ҳамда Энрике Рикельме жиддий ўзгаришларни амалга оширмоқчи.
Журналист Альберто Перейронинг хабар беришича, Перес «Манчестер Сити» ҳимоячиси Йошко Гвардиолни, шунингдек, турли манбалар томонидан қизиқиш билдирилаётгани бир неча бор таъкидланган «ПСЖ» ярим ҳимоячиси Жоау Невешни «Реал»га олиб келишни орзу қилмоқда.
«Transfermarkt» экспертлари 24 ёшли хорватиялик ва 21 ёшли португалиялик футболчиларнинг нархини мос равишда 70 ва 140 миллион еврога баҳоламоқда.
