PEPSI O‘zbekiston Superligasi 11-turining qiziqarli kechgan o‘yinlaridan birida "Lokomotiv" jamoasi o‘z maydonida "Buxoro"ni qabul qildi. Gollarga boy tarzda o‘tgan uchrashuvda "temiryo‘lchilar" 3:1 hisobida zafar quchishdi.
 
O‘yindan so‘ng o‘tkazilgan matbuot anjumanida "Lokomotiv" jamoasi bosh murabbiyi vazifasini bajaruvchi Andrey Fyodorov hamda o‘yinning eng yaxshi futbolchisi Ikrom Aliboyev ishtirok etishdi.

- Uchrashuv biz uchun oson o‘tmadi. O‘yinga kirishib ketishimiz qiyin kechdi. Keyin esa sekin-asta o‘z o‘yinimizni topib oldik va ketma-ket 2ta gol urishning uddasidan chiqdik. Ikkinchi bo‘limni ham yomon o‘tkazmadik. Faqatgina gol o‘tkazib yuborgan vaziyatda biroz bo‘sh o‘ynadik, xolos. Umuman olganda, turdan-turga o‘yinimiz ochilib borayotganini ayta olaman. Yigitlar maydonda imkon qadar yaxshi o‘yin namoyish etishga urinishyapti. Hali oldinda butun boshli 2-davra turibdi. Biz 2-davrani a’lo darajda o‘tkazishni istaymiz. Hali yozgi tanaffusda jamoalarda o‘zgarishlar bo‘ladi. Umid qilamanki, jamoamiz tanaffusda o‘z tarkibini va o‘yinini kuchaytiradi, - dedi tajribali mutaxassis.

- Uchrashuvning ilk daqiqalarida negadir o‘yinimiz o‘zimiz istagandek chiqmadi. Lekin 15-daqiqalardan keyin o‘yinga to‘liq kirishib keta oldik va yaxshi o‘ynay boshladik. Biz bugun chiroyli g‘alabaga erishdik. Umid qilamanki, muxlislarimiz namoyish etgan o‘yinimizdan mamnun bo‘lishdi, - dedi Aliboyev.