«Arsenal» Madridning «Atletiko» klubi hujumchisi Xulian Alvaresni o‘z safiga qo‘shib olish ustida ishlashda davom etmoqda.

Argentinalik futbolchi Angliyaga qaytishni istamagani sababli «kanonirlar» taklifini bir necha bor rad etgan. Biroq London klubi 26 yoshli forvardni ko‘ndirish niyatidan voz kechmagan.

TEAMtalk ma’lumotiga ko‘ra, «Arsenal» rahbariyati Alvares va uning oilasi Angliyaga ko‘chib o‘tganidan keyin yangi muhitga muammosiz moslashishi uchun barcha sharoitlarni yaratishga tayyor.

Bundan tashqari, tomonlar ehtimoliy kelishuvga maxsus band kiritish imkoniyatini ham muhokama qilgan. Unga ko‘ra, Alvares kelajakda «Barselona»ga o‘tish imkoniyatiga ega bo‘lishi mumkin.

Eslatib o‘tamiz, argentinalik hujumchi joriy yozda so‘nggi daqiqalarga qadar «Barselona»ga transferini amalga oshirishga harakat qildi. Biroq «Atletiko» rahbariyati futbolchini qo‘yib yuborishga rozi bo‘lmadi.

Endi esa Alvaresning atrofidagi shaxslar uning «Arsenal»ga o‘tishi g‘oyasiga ijobiy munosabatda ekani aytilmoqda.