Poytaxtimizda o‘tkazilayotgan sport kurashlari bo‘yicha o‘smirlar o‘rtasidagi Osiyo chempionati yakuniga yetdi.

Bugun musobaqaning so‘nggi kunida erkin kurash bo‘yicha yettita vaznda bellashuvlar bo‘lib o‘tdi. Quvonarlisi bugun o‘tkazilgan bahslarda besh nafar sportchimiz shohsupaga ko‘tarilishga muvaffaq bo‘ldi. Ularning biri esa Osiyo chempionlini qo‘lga kiritish bilan birgalikda, oktyabr oyida Buenos-Ayresda bo‘lib o‘tadigan III yozgi o‘smirlar Olimpiya o‘yinlarida ishtirok etish huquqiga ham ega bo‘ldi.

-45kg vazn toifasida yurtimiz sharafini himoya qilgan Sarvarbek Xudoyberganov bronza medalini qo‘lga kiritdi. -48kg vaznda musobaqada ishtirok etgan Umidjon Jalolov esa barcha raqiblarini mag‘lubiyatga uchratib, oltin medal sohibiga aylandi. Endi u Argentinadagi o‘yinlarda yurtimiz sharafini himoya qiladi. -51kg vaznli erkin kurashchimiz Arslon Rahimov ham qit’a chempioniga aylandi. Ammo, ushbu vazn toifasida Olimpiya vazni hisoblanmaydi. -60kg vazn toifasida bellashuvlarda qatnashgan Mirkamol Beshimov ham bronza medalini qo‘lga kiritib, sovrindorlar qatoridan o‘rin olishga muvaffaq bo‘ldi. -92kg vaznli erkin kurashchimiz Shohjahon Avazov ham bronza medaliga sazovor bo‘ldi.

Shu tariqa, yakunlangan Osiyo chempionatida umumiy hisobda to‘rtta lisenziya qo‘lga kiritdik. Ma’lumot uchun yunon-rum va erkin kurashda Osiyo qit’asi uchun beshtadan yo‘llanma ajratilgan. Ayollar kurashida esa umumiy hisobda 10ta lisenziya taqsimlangan. Yunon-rum kurashida Asilbek Nematov (-60kg) yo‘llanma sohibiga aylandi. Qayd etib o‘tish lozimki, yunon-rum kurashi bahslarida Markaziy Osiyo vakillari ichida faqatgina O‘zbekiston lisenziya qo‘lga kirita oldi. Ayollar kurashida Shohida Ahmedova (-49kg) va Svetlana Oqnazarova (-73kg), erkin kurashchilarimiz ichida esa Umidjon Jalolov (-48kg) Argentina yo‘llanmasini naqd qilib qo‘ydi.

Milliy Olimpiya qo‘mitasi O‘zbekiston sport kurashlari assosiasiyasi, sportchi va ularning murabbiylarini ushbu muvaffaqiyat bilan tabriklab qoladi.