O‘zbekiston futbol assosiasiyasi futbol muxlislariga xushxabar ulashishda davom etadi. Ma’lumki, O‘zbekiston futbol assosiasiyasi O‘zbekiston milliy terma jamoasi uchun o‘rtoqlik o‘yinlariga kuchli raqiblar topish bo‘yicha chora-tadbirlarni davom ettirmoqda.
Jumladan, tarixda birinchi marta O‘zbekiston milliy terma jamoasi uchun mundialga yo‘llanma olgan Marokash, Senegal, Urugvay kabi terma jamoalar bilan Jahon chempionati oldidan o‘rtoqlik o‘yinlari tashkil qilindi va tashkil qilinmoqda. Joriy yilning 19 may kuni O‘zbekiston milliy terma jamoasi Eronga qarshi Tehronning “Ozodiy” stadionida o‘rtoqlik uchrashuvi o‘tkazishi xaqida ham ma’lumot bergan edik.
Endi esa ko‘plab o‘zbekistonlik futbol muxlislarining xohish- istaklarini inobatga olgan holda, Milliy olimpiya qo‘mitasining Prezidenti hamda O‘zbekiston futbol assosiasiyasining birinchi vise prezidenti Umid Ahmadjonovning Qatar futbol federasiyasi bilan imzolagan memorandumiga asosan, FIFA kuni hisoblangan 2018 yilning 16 oktyabr kuni Toshkent shahrida Qatar terma jamoasi bilan o‘rtoqlik uchrashuvi o‘tkazishga kelishildi.
O‘zbekiston milliy terma jamoasi uchun kuchli raqiblar bilan o‘rtoqlik o‘yinlari tashkil qilish yuzasidan amalga oshirilayotgan chora-tadbirlar davom etadi.
